EAEO elderi AÓK boıynsha yntymaqtastyqty damytpaq

ASTANA. QazAqparat - «EAEO-na múshe memleketterdiń agroónerkásip keshenindegi ımport almastyrý perspektıvalary» atty dóńgelek ústel otyrysynda agroónerkásipti damytý men yntalandyrý máseleleri sóz boldy, dep habarlaıdy Eýrazııalyq ekonomıkalyq keńestiń baspasóz qyzmeti.

EEK-tiń Agroónerkásip saıasaty departamentiniń dırektory Stanıslav Býben Eýrazııalyq ekonomıkalyq odaq elderi úshin ımport almastyrý saıasatyn júzege asyrý men ishki naryqty jeke, sapaly jáne qoljetimdi ónimdermen qamtamasyz etýdiń óte ózekti ekendigine senim bildirdi.

«Búginde EAEO elderiniń taýar aınalymynyń 61 paıyzyn ımport quraıdy. Ádette bul taýarlar odaq aýmaǵynda óndirýge bolatyn taýarlar. Qarjylaı alǵanda ónimderdi satyp alýǵa 26,5 mlrd AQSh dollary shyǵyndalady. Salystyrmaly alǵanda, odaqqa múshe elderdiń jyldyq memlekettik qoldaý kólemi úsh ese az»,-dep atap ótti Stanıslav Býben.

Mysaly, jıdek túrleri boıynsha alǵanda, EAEO 2016 jyly quny 426 mln AQSh dollary bolatyn ónimderdi ımporttady. EAEO elderine 1,9 mlrd dollar kóleminde et ónimderiniń túrleri jetkizildi.

Dóńgelek ústel otyrysyna qatysýshylar jaǵdaıdy ózgertýmen baılanysty máselelerdi talqylady. Agroónerkásip kesheni boıynsha ımport almasý birinshi kezekte aýyl sharýashylyǵy ónimderi men taýarlarynyń básekege qabilettiligin arttyrýdy yntalandyrýshy tásil retinda qarastyryldy.

EAEO-ta azyq-túlikti óndirýdi damytý salasyndaǵy yqpaldastyqty tereńdetýge baǵyttalǵan kooperatsııalyq jobalardy júzege asyrý men qalyptastyrý baǵytyndaǵy usynystar qaraldy. Olardyń qatarynda mysaly keshendi taǵam qospalary men aqýyz ónimderin, janýarlar men ósimdikterdiń proteınderin shyǵaratyn birlesken óndiristerdi ashý sııaqty jobalar bar.