EAEO elderi arasynda aýdıtorlyq qyzmettiń biryńǵaı naryǵy qurylady - Májilis

<p>Májilis &laquo;Eýrazııalyq ekonomıkalyq odaq sheńberinde aýdıtorlyq qyzmetti júzege asyrý týraly kelisimdi ratıfıkatsııalaý týraly&raquo; zań jobasyn qabyldady, dep habarlaıdy <a href="https://kaz.inform.k/" target="_blank" rel="noopener">QazAqparat</a> tilshisi.</p>

Májilistiń jalpy otyrysynda zań jobasyn tanystyrǵan Qarjy mınıstri Erulan Jamaýbaev qujattyń EAEO-ǵa múshe elderde aýdıtorlyq qyzmettiń biryńǵaı naryǵyn qalyptastyrýǵa, retteýge baǵyttalǵanyn aıtty.  

«Kelisimniń maqsaty – Odaqta aýdıtorlyq qyzmetterdiń biryńǵaı naryǵyn qalyptastyrý. Atap aıtqanda, ornalasqan elde qosymsha mekeme ashpastan, shekteýler men alyp qoıýlarsyz aýdıtorlyq qyzmetterdi kórsetý jáne alý, aýdıtorlardyń biliktilik attestattary men aýdıtorlyq qorytyndylaryn ózara taný bolyp tabylady. Kelisim aýdıtorlarǵa, uıymdarǵa, aýdıtorlyq qyzmetti júzege asyrýǵa quqyqtyń týyndaýy men toqtatylýyna, emtıhandarǵa, sapaǵa syrtqy baqylaý júrgizýge jáne aýdıtorlyq qyzmet standarttaryna biryńǵaı talaptardy aıqyndaıdy. Qazaqstan úshin aýdıtorlyq qyzmetti ishki retteýdiń keıbir erekshelikteri kelisimniń 32-babynda eskerilgen. Bul erekshelikter qazaqstandyq aýdıtorlar men aýdıtorlyq uıymdardyń quqyqtaryna qysym kórsetpeýge múmkindik beredi», - dedi Erulan Jamaýbaev.

Aıta keteıik, atalǵan kelisim aıasynda múshe memleketterdiń aýdıtorlyq uıymdaryna EAEO elderinde qyzmetin júzege asyrýǵa ruqsat etiledi.

Qarjy mınıstri Erulan Jamaýbaev kelisim 2 kezeń boıynsha kúshine enetinin atap ótti. Alǵashqy satysynda uıymdastyrý máselelerine qatysty baptar qoldanysqa enedi. Odan keıin Eýrazııalyq ekonomıkalyq odaqtyń Joǵarǵy keńesi aıqyndaǵan kúnnen biryńǵaı naryq jumys istep bastaıdy.

Talqylaýlar nátıjesinde Májilis zańdy qabyldap, Senattyń maquldaýyna jiberdi.