EAEO-da qupııa aqparatty qorǵaýǵa qatysty Armenııanyń jaýapkershiligi bekitildi

NUR-SULTAN. QazAqparat – Parlament Senatynyń jalpy otyrysynda «2014 jylǵy 12 qarashadaǵy Eýrazııalyq ekonomıkalyq komıssııanyń básekelestiktiń biryńǵaı qaǵıdalarynyń saqtalýyn baqylaý jónindegi ókilettikterdi júzege asyrýy kezinde qupııa aqparatty qorǵaý tártibi jáne ony jarııa etkeni úshin jaýaptylyq týraly kelisimge Armenııanyń qosylýy týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Eýrazııalyq ekonomıkalyq odaqtyń qurylǵanyna 5 jyl boldy. Osy kezeńde Eýrazııalyq ekonomıkalyq odaqqa Armenııa Respýblıkasy men Qyrǵyz Respýblıkasy qosyldy. Eýrazııalyq ekonomıkalyq komıssııa básekelestiktiń jalpy qaǵıdalarynyń saqtalýyna, onyń ishinde, eger bul básekelestikke teris yqpal etetin bolsa, transshekaralyq naryqtardaǵy talaptar buzýshylyqtarynyń jolyn kesý boıynsha baqylaýdy júzege asyrady. Eýrazııalyq ekonomıkalyq komıssııa transshekaralyq naryqtardaǵy básekelestiktiń jalpy qaǵıdalarynyń buzylýy týraly ótinishterdi qaraý, tergeý júrgizý jáne isterdi qarastyrý kezinde, qupııa aqparatty qorǵaý tártibi jáne ony jarııa etkeni úshin jaýapkershilik týraly qupııa aqparat Kelisim normalarymen qorǵalady», - dep túsindirdi Básekelestikti qorǵaý jáne damytý agenttiginiń tóraǵasy Serik Jumanǵarın.

Bul kelisimge 2014 jyly 12 qarashada Qazaqstan Respýblıkasy, Reseı Federatsııasy jáne Belarýs Respýblıkasymen birlesip qol qoıǵan.

Ratıfıkatsııalanatyn hattamaǵa sáıkes Armenııa Respýblıkasy kelisimge qosylady.

«Armenııanyń osy kelisimge qosylýy onyń Eýrazııalyq ekonomıkalyq odaqqa múshe memleketterdiń sýbektilerine qatysty transshekaralyq naryqtardaǵy básekelestiktiń jalpy qaǵıdalarynyń saqtalýyn baqylaý jónindegi Eýrazııalyq ekonomıkalyq komıssııanyń ókilettigin iske asyrýǵa tolyq quqyqty qatysýyn qamtamasyz etýge múmkindik beredi», - dedi agenttik basshysy.