EAEO-da kásipkerlerimiz «astyrtyn» kedergilerge tap bolyp otyr - Toqaev
«Atap aıtqanda, Eýrazııalyq ekonomıkalyq odaqtyń ortaq naryǵynyń tıimdiligin barynsha qamtamasyz etý jáne kedergilerdi tolyǵymen joıý, Odaq naryǵyndaǵy taýarlardyń, kórsetiletin qyzmetterdiń, kapıtaldyń jáne jumys kúshiniń erkin aınalymyndaǵy shekteýlerdi barynsha qysqartý arqyly bıznes pen tutynýshylarǵa arnalǵan múmkindikterdi keńeıtý - negizgi baǵyttardyń qatarynda. Soǵan qaramastan, áli kúnge deıin múshe memleketter tarapynan seriktes elderdiń múddeleri eskerilmeı, óz ishki naryqtaryn qorǵaý maqsatyn kózdeıtin sharalar oryn alýda. EAEO aıasynda erkin saýdaǵa aıtarlyqtaı tosqaýyl bolyp otyrǵan túıtkilderdiń qatarynda ózara saýdany júzege asyrý, taýarlardy tranzıtteý jáne ishki naryqqa qol jetkizý kezindegi qıyndyqtar, jekelegen taýarlardyń ákelinýine shekteý qoıý máseleleri, jergilikti bılik organdary tarapynan jasalatyn kedergiler bar. Deklaratsııalaýdy talap etetin kedendik shekaralardyń bolmaýyna qaramastan, kásipkerlerimiz birqatar «astyrtyn» kedergilerge tap bolyp otyr», - dedi Q. Toqaev Senatta EAEO-daǵy Qazaqstannyń saýda saıasatyn iske asyrý máseleleri týraly Úkimet saǵatynda.
Onyń sózine qaraǵanda, mundaı jaǵdaı syrtqy saýdaǵa teris áser etedi, bıznes qoǵamdastyǵynyń eýrazııalyq ıntegratsııaǵa degen senimsizdigin týdyrady jáne ıntegratsııanyń damýyna qıyndyqtar keltiredi.
«Álemdik qarjy jáne taýar naryqtarynda oryn alyp otyrǵan turaqsyzdyq, sanktsııalyq teketirester Eýrazııalyq ekonomıkalyq odaqtyń ıntegratsııalyq áleýetine teris yqpal etip otyrǵany anyq. Bul múshe memleketterdiń saýda-ekonomıkalyq saıasatyn úılestirý jumysyn ońtaılandyrýdy talap etedi», - dedi Qasym-Jomart Toqaev.