EAEO-da eńbek naryǵy lıberalızatsııalanbaq

ASTANA. QazAqparat - Eýrazııalyq ekonomıkalyq komıssııa (EEK) Reseı Federatsııasyna Eýrazııalyq ekonomıkalyq odaqqa kiretin (EAEO) basqa elderdiń jumys isteıtin azamattary men olardyń otbasy múshelerine ýaqytsha turý mártebesin berýge keńes berdi, dep habarlaıdy QazAqparat komıssııanyń baspasóz qyzmetine silteme jasap.

Sondaı-aq, EEK múshe-memleketterdiń azamattaryna elden shyqpaı málim etilgen kirý maqsatyn ózgertý úshin eńbek kelisimshartyn jasaýǵa múmkindik berý týraly bastama kóterdi. Bul týraly EEK ekonomıka jáne qarjy saıasaty jónindegi kollegııa múshesi (mınıstr) Tımýr Jaqsylyqov Almatydaǵy TMD qatysýshy-memleketteri Kóshi-qon organdary basshylarynyń keńesi (KOBK) otyrysynda málim etti.

EEK mınıstriniń pikirinshe, odaq memleketterinde qolaıly bıznes jaǵdaıdy qalyptastyrý faktorlarynyń biri - ortaq eńbek naryǵyn qurý. Búginde EAEO elderi azamattary jumysqa ornalasý úshin teń múmkindikke ıe.

«Olarǵa qatysty óz eńbek naryǵyn qorǵaý maqsatynda ulttyq zańnamada belgilengen shekteýler qoldanylmaıdy, jumysqa mindetti ruqsat qujattary joıyldy», - dep habarlady Tımýr Jaqsylyqov.

Sonymen qatar, qazirgi tańda komıssııa jumys istep jatqan birqatar sheshimin tappaǵan máseleler bar.

Sondaı máselelerdiń biri - Reseı Federatsııasynda ornalasý jeri boıynsha kóshi-qon tirkeý rásiminiń kúrdeliligi, sondaı-aq Reseı Federatsııasynyń aýmaǵynan shyqqannan keıin ruqsat etilgen mekendeý merzimine qaıta tirkelý qajettiligi.

«Bizdiń oıymyzsha, Reseı Federatsııasy jasalǵan eńbek kelisimshartynyń merzimi aıaqtalǵanǵa deıin jumys isteıtin azamattar men olardyń otbasy múshelerine ýaqytsha turý úshin ruqsat beretin zań jobalaryn qabyldaý arqyly bul máseleni sheshýge bolady», - dep esepteıdi EEK mınıstri.

Osyǵan baılanysty EEK mınıstri basqa EAEO elderine qaıta kirý maqsatyn ózgertýdi talap  etpeıtin Qazaqstan tájirıbesin qoldanýdy usyndy.