EAEO: Balalar taǵamy tańbalanýǵa jatatyn ónimder tiziminen alynyp tastaldy

MÁSKEÝ. QazAqparat – 23 jeltoqsan kúni ótken Eýrazııalyq ekonomıkalyq komıssııa keńesi otyrysynyń qorytyndysy boıynsha sáıkestendirý quraldarymen tańbalaýǵa jatatyn sút ónimderiniń jekelegen túrleriniń tizbesi bekitildi. Bul týraly búgin brıfıng barysynda EEK Alqasy Tóraǵasynyń kómekshisi Iıa Malkına málim etti. Bul týraly QazAqparattyń menshikti tilshisi habarlaıdy.

«EEK keńesi sáıkestendirý quraldarymen tańbalanýǵa jatatyn taýarlardyń – sút ónimderiniń jekelegen túrleriniń tizbesin bekitti. Atap aıtqanda, osy tizbedegi tańbalanbaǵan taýarlardy aınalymǵa jiberýge tyıym salýdy engizý merzimderi anyqtaldy», – dep atap ótti I.Malkına.

Qujatta Odaqtyń búkil aýmaǵynda taýarlardy mindetti tańbalaýdy engizýdiń úsh kezeńi usynylǵan:

1. 2021 jylǵy 1 maýsymǵa deıin – irimshikter úshin, sondaı-aq balmuzdaq jáne quramynda kakao bar nemese joq taǵamdyq muzdyń ózge de túrleri úshin.

2. 2021 jylǵy 1 qyrkúıekke deıin – saqtaý merzimi 40 táýlikten asatyn sút ónimderi úshin (sút, kilegeı, ıogýrt, aıran, súzbe, sary maı).

3. 2021 jylǵy 1 jeltoqsanǵa deıin – saqtaý merzimi 40 táýlikke deıin qosa alǵanda sút ónimderi úshin.

EEK ókili atap ótkendeı, sheshim qabyldanyp, tańbalaýdy qajet etpeıtin ónim anyqtaldy. Bul, mysaly, úsh jasqa deıingi balalarǵa arnalǵan taǵam. Taýar qaldyqtaryn tańbalaý da júzege asyrylmaıdy. Qabyldanǵan sheshimge sáıkes, tańbalaýdy engizý kúnin ár el derbes aıqyndaıtyn bolady.

«Reseı Federatsııasynda tańbalanbaǵan ónim aınalymyna tyıym salýdyń kórsetilgen merzimderi bar sút ónimderin tańbalaýdy engizý týraly sheshimder qabyldanyp qoıǵanyn eske salamyn», – dep habarlady I. Malkına.