EAEO Azııa jáne Taıaý Shyǵyspen belsende túrde saýda jasaýy kerek – QR Prezıdenti

SANKT-PETERBÝRG. QazAqparat – Eýrazııalyq ekonomıkalyq odaq Azııa men Taıaý Shyǵys naryqtaryn qamtı otyryp belsendi saýda saıasatyn júrgizýi kerek. Bul týraly Peterbýrg halyqaralyq ekonomıkalyq forýmynyń plenarlyq otyrysyna Qazaqstan Prezıdenti Qasym-Jomart Toqaev málim etti, dep habarlaıdy QazAqparat tilshisi.

Memleket basshysy Eýrazııalyq ekonomıkalyq odaq aıasynda Reseı Qazaqstan úshin basty saýda-ekonomıka salasyndaǵy seriktes ekenin atap ótti.

«Byltyr eki eldiń ózara saýda aınalymy úshten birge artyp, 24 mıllıard dollarǵa jetti. Biz úshin bul – rekord. Bıyl bul baǵyttaǵy oń qarqyn saqtalyp otyr. Jańa jaǵdaıdy eskere otyryp, Eýrazııalyq ekonomıkalyq odaq aıasynda jańa saýda strategııasyn ázirleýmen aınalysqan oryndy ári paıdaly bolar edi. Tıimdiligi kúmándi kontrsanktsııanyń ornyna Azııa men Taıaý Shyǵys naryǵyn tutas qamtıtyn belsendi ári ońtaıly saýda saıasatyn júrgizgen jón. Qazaqstan qandaı da bir «býferlik naryq» qyzmetin atqarar edi. Jalpy, Eýrazııalyq ıntegratsııanyń túbegeıli jetistikke jetýi bizdiń birlesken saýda strategııamyzdyń tıimdiligine baılanysty», – dedi Qasym-Jomart Toqaev.

Sonymen qatar Memleket basshysy Qazaqstan men Reseı arasyndaǵy ónerkásip kooperatsııasyn múlde jańa deńgeıge kóterýdiń perspektıvasy zor ekenin atap ótti. Prezıdent reseılik ınvestorlarǵa tıisti ınfraqurylymy bar ónerkásip alańdaryn usynýǵa jáne qolaıly jaǵdaı jasaýǵa ázir ekenin málimdedi.