EAEO aıasynda úshinshi eldermen saýdada tehnıkalyq kedergilerdi joıý sharttary aıqyndalady

ASTANA. QazAqparat – Májilistiń jalpy otyrysynda «Úshinshi eldermen ózara saýdadaǵy tehnıkalyq kedergilerdi joıý tártibi jáne sharttary týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Osy Kelisimge qol qoıý Eýrazııalyq ekonomıkalyq odaq týraly sharttyń 55-babynda eskerilgen. Kelisim múshe memleketterdiń úshinshi eldermen ózara saýdasyndaǵy EAEO-nyń tehnıkalyq reglamentteri qoldanylatyn ónimge qatysty kedergilerdi joıý tártibi men sharttaryn aıqyndaıdy. Osyǵan deıin EAEO-nyń 52 tehnıkalyq reglamenti qabyldandy, onyń 45-i kúshine endi», - dedi QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın.

Onyń aıtýynsha, kelisimdi qabyldaý EAEO-da jáne úshinshi eldiń aýmaǵynda belgilengen mindetti talaptardyń salystyrmalylyǵyn aıqyndaý negizinde sáıkestikti baǵalaý nátıjelerin ózara tanýdy júzege asyrýǵa múmkindik beredi.

«Kelisimde sondaı-aq múshe memleketterde jáne úshinshi elde qoldanylatyn sáıkestikti baǵalaý jónindegi organdardy akkredıtteý rásimderiniń balamalylyǵy qamtamasyz etilýi tıis ekendigi kózdelgen. Usynylǵan tásil otandyq ónimdi ilgeriletýge baǵyttalǵan. Kelisimde qoldanystaǵy zańnamanyń talaptary eskerilgen, osyǵan baılanysty ony ratıfıkatsııalaý Qazaqstan Respýblıkasynyń zańdaryna ózgerister engizýge alyp kelmeıdi», - dedi mınıstr.