EAEO aıasynda ıntegratsııany ilgeriletý úshin kásibı mámilegerler qajet - sarapshy

ASTANA. QazAqparat – Qazaqstan Eýrazııalyq ekonomıkalyq odaqtan shyǵý máselesin kóterip jatqan joq. Jibek Joly telearnasynyń «JJ Talk» baǵdarlamasyna suhbat bergen Qazaqstan ǵylymı-zertteýler ınstıtýtynyń ǵalym hatshysy Ásel Nazarbetova osylaı málimdedi, dep habarlaıdy QazAqparat tilshisi.

«Eýrazııalyq ekonomıkalyq odaq sheńberinde máseleler bar. Olar tıisti memlekettik organdarǵa ýaqtyly jetkizilip jatyr. Birinshi kezekte ol - bıznestiń janaıqaıy. Olardy kelissóz júrgizý arqyly sheshý kerek. Osy oraıda, taǵy bir problema bar – bizge kásibı mámilegerler, qarjygerler men ekonomıster qajet. Olar qazir osy odaq aıasynda bar máselelerdi kóterip, solardy sheshe alatyndaı dárejede bolýy tıis», - dedi Ásel Nazarbetova.

Sarapshy búginde elimiz EAEO-dan shyǵý bastamasyn qarastyrmaıtynyn málim etti. Onyń sózinshe, bul odaqqa qatysty sheshimder birinshe kezekte ulttyq múddeni eskere otyryp qabyldanady.

«Ár memlekettiń óz múddesi, pozıtsııasy bar. Qazirgi jaǵdaıda bizdiń pozıtsııamyz utymdyraq. Bizdiń eldiń basshylyǵy qandaı da bir sheshim qabyldamas buryn, ony ulttyq múdde turǵysynan qarastyrady. Odaqqa qatysty da sondaı qaǵıda bar. Qazir odan shyǵý máselesi kóterilip jatqan joq. Prezıdent búginde bar máseleni sheship, ony ekonomıkalyq odaq retinde tıimdi paıdalansaq, sol mańyzdy degendi aıtty», - dep toqtaldy Ásel Nazarbetova.