EAEO aıasynda halyqaralyq tórelik sot qurý ıdeıasy áli naqtylanǵan joq – Janel Kýshýkova

NUR-CULTAN. QazAqparat – Eýrazııalyq ekonomıkalyq odaq aıasynda tórelik sot qurý ıdeıasyna degen Qazaqstannyń ustanymy qandaı? Ashyq úkimet portalynyń qoldanýshysy Saýda jáne ıntegratsııa mınıstrligine osyndaı saýal qoıdy, dep habarlaıdy QazAqparat tilshisi.

Eýrazııalyq ekonomıkalyq odaq máseleleri týraly onlaın-konferentsııada qoıylǵan bul suraqqa Saýda jáne ıntegratsııa vıtse-mınıstri Janel Kýshýkova jaýap berdi.

«Búgingi tańda Eýrazııalyq ekonomıkalyq ıntegratsııany damytýdyń 2025 jylǵa deıingi strategııalyq baǵyttarynda sharýashylyq júrgizýshi sýbektilerdiń ótinishteri boıynsha daýlardy qaraý úshin EAEO sheńberinde halyqaralyq tórelik qurý týraly bastamany pysyqtaý jónindegi is-shara kózdelgen. Osy baǵytty iske asyrý sheńberinde taraptar osy máseleni tolyq zerdelep jáne tıisti baıandama daıyndaý kerektigi týraly kelisti. Aıta ketý kerek, EAEO-ǵa múshe barlyq memleketterde ulttyq zańnamaǵa sáıkes EAEO-ǵa múshe memleketterdiń saýda-ónerkásip palatalary janynan halyqaralyq kommertsııalyq tórelik sottar qurylǵan. Qazaqstanda «Atameken» ulttyq kásipkerler palatasynyń tórelik ortalyǵy jumys isteıdi», - dedi mınıstrlik ókili.

Onyń aıtýynsha, odaqtyń aldaǵy 5 jylǵa arnalǵan damý strategııasynda ortaq tórelik sot qurý ıdeıasy naqty kórinis tapqanymen, onyń qanshalyqty oryndy usynys ekeni áli aıqyndalmaǵan.

«Taraptar quqyq qoldaný praktıkasyna, onyń ishinde Eýrazııalyq ekonomıkalyq komıssııaǵa sharýashylyq júrgizýshi sýbektilerden túsetin ótinishterdi muqııat taldap baryp, osydan keıin EAEO sheńberinde halyqaralyq tórelik qurýdyń oryndylyǵyn aıqyndaý kerek degen toqtamǵa keldi», -deıdi vıtse-mınıstr.