EAEO aýmaǵynda kóleńkeli taýar aınalymy kóbeıdi – Qarjy mınıstrligi

NUR-SULTAN. QazAqparat – QR Qarjy vıtse-mınıstri Marat Sultanǵazıev Eýrazııalyq ekonomıkalyq odaq aýmaǵyndaǵy keıbir jeńildetilgen rejım saldarynan kóleńkeli taýar aınalymy kóbeıgenin aıtyp berdi, dep habarlaıdy QazAqparat.

«Bizdiń EAEO elderimen shekaradaǵy jumysymyzdy monıtorıngteý nátıjesi kedendik baqylaýdyń kúshin joıý jáne odaq sheńberinde taýarlardyń erkin qozǵalysy rejımi rettelmeıtin saýdaǵa jáne kóleńkeli taýar aınalymynyń ulǵaıýyna ákep soqqanyn kórsetti», - dedi vıtse-mınıstr Ortalyq kommýnıkatsııalar qyzmetinde ótken brıfıngte.

Spıkerdiń aıtýynsha, salyq tóleýden jaltarýdyń: jalǵan tranzıt, Qazaqstan Respýblıkasynyń jalǵan rezıdentteriniń atyna taýar-kólik júkqujattaryn rásimdeý, taýar-kólik júkqujattaryndaǵy málimetterdi durys bermeý jáne taǵy basqa shemalary anyqtalǵan.

«Osy problemany retteý úshin biz EAEO elderimen birlesip, taýarǵa ilespe qujattardaǵy málimetterdiń durystyǵyn baqylaý jáne úshinshi elderden ákelingen ózara saýdadaǵy taýarlar boıynsha baǵa ındıkatorlary derekqoryn qalyptastyrý tetigin ázirleýdi josparlap otyrmyz.

Jalpy, ıntegratsııany damytý jumystary qazir de júrip jatyr. Eýrazııalyq ekonomıkalyq odaq strategııasy josparlanǵan merzimde kezeń-kezeńimen iske asyrylady. Osylaısha, bizdiń kásipkerlerge syrtqy ekonomıkalyq qyzmetti júrgizý, taýarlarymyzdyń básekege qabiletin qamtamasyz etý jáne ótkizý naryqtaryn tabý úshin jaǵdaı jasaý – biryńǵaı naryqtardy qalyptastyrýda memleket úshin basymdyq bolyp sanalady», - dedi Marat Sultanǵazıev.