EAEO Astanada Iran jáne Qytaımen kelisimge qol qoıady - Vladımır Pýtın
«Osy aptada Astanada Qytaımen saýda-ekonomıkalyq kelisim týraly jáne Iranmen erkin saýda aýmaǵyn qurý týraly ýaqytsha kelisimge qol qoıý josparlanyp otyr. Sonymen birge, Izraıl, Serbııa jáne Sıngapýrmen artyqshylyqty bere biler kelisimke kelý boıynsha kelissózder jalǵasyp jatyr. Jýyq arada Mysyr eli jáne Úndistanmen osyǵan uqsas kelissózder bastalady», - dedi Vladımır Pýtın Joǵary Eýrazııalyq ekonomıkalyq keńestiń otyrysynda sóılegen sózinde.
Eýrazııalyq ekonomıkalyq komıssııanyń (EEK) makroekonomıka jáne ıntegratsııa boıynsha alqa(mınıstr) múshesi Tatıana Valovaıa qazaqstandyq tilshilerge bergen suhbatynda osy kelissózdermen qatar, EEK halyqaralyq yntymaqtastyqtardyń keń aýqymdy bloktarymen aınalysyp jatqanyn túsindirdi.
«Qazaqstan 2016 jyly EAEO-da tóraǵalyq etkende qazaqstandyq tóraǵalyqtyń basym baǵyttarynyń biri bizdiń negizgi saýda-ekonomıkalyq seriktestermen qarym-qatynasty damytý bolatyn. Bul mindet - bir jyldyń ǵana jumysy emes. Biz ony ári qaraı iske asyrýdy jalǵastyryp kelemiz. Bul rette erkin saýda aýmaǵy jaıly ǵana emes, jalpy ahýal turǵysynda aıtylyp otyr», - dep túsindirdi ol.
Onyń aıtýynsha, EAEO úkimettermen, halyqaralyq jáne aımaqtyq uıymdarmen 50-ge tarta memorandýmǵa qol qoıǵan.
«Osy kelisimder aıasynda bizdiń baılanystardy alǵa tarta kele, bir mezgilde birneshe mindetterdi atqaryp jatyrmyz. EAEO-daǵy memleketterimizdiń jalpy bıznesi úshin alań qurylýda. Máselen, Latyn Amerıkasy. Aıtarlyqtaı qashyqtaǵy jáne kúrdeli bıznes desek te, eger baılanystyń qosymsha múmkindikterin retke keltire bilsek, álbette qyzyqty jobalar paıda bolady», - dedi Tatıana Valovaıa.
Sonymen birge, Tatıana Valovaıa ártúril bıznes-forýmdar uıymdastyrylyp jatqanyn tilge tıek etti.
«Osy forýmdar aıasynda biz EAEO-nyń múmkindikteri týraly aıtýǵa múmkindik alamyz. Bizdiń sheteldegi seriktesterimizde Eýrazııalyq ekonomıkalyq odaq týraly jetkilikti málimet joq. Máselen, olarǵa ishki shekarasyz ekonomıkalyq odaqtyń bary álbette qyzyqty. Túptep kelgende, máselen olar Qazaqstanmen ınvestıtsııa nemese saýda turǵysynda qandaı da bir qarym-qatynasty damyta otyryp, Eýrazııalyq ekonomıkalyq odaqqa kire alady», - dedi ol.
Aıta keteıik, Reseıdiń Sochı qalasynda memleket basshylarynyń qatysýymen Joǵary Eýrazııalyq ekonomıkalyq keńestiń (JEEK) kezekti otyrysy ótýde. Sharaǵa Qazaqstan Prezıdenti Nursultan Nazarbaev, Reseı basshysy Vladımır Pýtın, Qyrǵyzstan prezıdenti Sooronbaı Jeenbekov, Belarýs basshysy Aleksandr Lýkashenko jáne Armenııa Premer-Mınıstri Nıkol Pashınıan qatysýda. Basqosýda Eýrazııalyq ekonomıkalyq odaq (EAEO) aıasyndaǵy kópbaǵytty yntymaqtastyqtyń túrli aspektileri, uıymnyń uıymdastyrý-kadrlyq baǵyttaǵy sharalary men aǵymdaǵy jumys barysy sóz bolady dep kútiledi. Kún tártibine 15 másele qoıylǵan. Olardyń ekeýi shaǵyn quramda qaralady.
Foto: kremlin.ru