EADB «Saryarqa» gaz qubyrynyń qurylysyna 102 mlrd teńge baǵyttaıdy
«Qazir ýaqytta Astanaǵa deıingi gaz qubyrynyń qurylysy jobasyna qatysty qamdanyp jatyrmyz. Osy jaıynda ótken jyly talqylaǵan edik. Bizdiń nesıelik komıtet bul kelisimshartty maquldady, endi tájirıbe júzinde iske asyrýǵa kóship jatyrmyz. Biz úshin onyń somasy aıtarlyqtaı qomaqty, sebebi 102 mlrd teńge kólemindegi qarjy qarastyrylyp otyr. Sharttyń talaptary kúrdeli, alaıda onyń aıasynda Qazaqstannyń damý bankimen birgemiz», - dedi Eýrazııalyq damý bankiniń basqarma tóraǵasy Andreı Belıanınov ІІ Eýrazııalyq BAQ kongresinde.
Onyń sózine qaraǵanda, 2018 jyldyń qorytyndysy boıynsha Eýrazııalyq damý bankiniń ınvestıtsııasy kólemi 1,6 mlrd AQSh dollaryna jetip, bul kórsetkish 2017 jyldaǵydan 2,5 esege artyq boldy.
«2018 jyly 29 jańa joba boıynsha kelisimshartqa qol qoıyldy. Ótken jylda nesıelik portfel 48 paıyzǵa ósip, 3,4 mlrd dollardy qurady. Al búginde onyń kólemi 3,6 mlrd shamasynda», - dedi bank basshysy.
Atalǵan banktiń nesıelik portfelinde ıntegratsııalyq jobalardyń úlesi 59 paıyz deńgeıinde.
Sonymen qatar ol QR Ulttyq bankine óziniń alǵysyn jetkizdi.
«QR Ulttyq banki bizdiń banktiń aldynda turǵan eleýli problemalarǵa túsinistikpen qarap otyr. Bul turǵyda QR Ulttyq banki Qazaqstan ekonomıkasy maqsattaryn erekshe nazarǵa alady. Biz bul baǵytta ózara is-qımyldarymyzdy nyǵaıtýdamyz», - dedi ol.
Esterińizge sala keteıik, 2018 jylǵy jeltoqsanda Indýstrııalandyrýdyń ekinshi besjyldyǵy aıasyndaǵy jalpy ulttyq telekópir barysynda Elbasy Nursultan Nazarbaev «Saryarqa» gaz qubyrynyń qurylysyn bastaýǵa ruqsat berdi.
«Saryarqa» magıstraldyq qubyry úlken qalalardan bólek 171 eldi mekenge gaz tartylady.
Onyń ishinde Nur-Sultan qalasy mańy men Qaraǵandy oblysynyń 119 eldi mekeni jáne Aqmola oblysynyń 51 eldi mekeni tabıǵı gazben kezeń-kezeńimen qamtamasyz etiledi. Sondaı-aq, joba qurylysy 1690 adamdy jumyspen qamtıdy dep kútilýde.
«Saryarqa» gaz qubyrynyń qurylysy josparǵa sáıkes 2019 jyldyń jeltoqsan aıynda aıaqtalady.
Atap óteıik, qubyrdy tórt kezeńde salý josparlanyp otyr. Birinshi kezeńde Jezqazǵan-Qaraǵandy-Nur-Sultan baǵytyndaǵy magıstraldy gaz qubyrynyń qurylysy júrgiziledi. Ekinshi kezeńde Nur-Sultan qalasynan Kókshetaýǵa deıin gaz qubyryn tartý, al úshinshi kezeńde Petropavl qalasyna tartý kózdelip otyr. Sońǵy kezeńde Jezqazǵan men Temirtaýdaǵy kompressorlyq stantsııalardyń qurylysy qarastyrylǵan. Qubyrdyń jalpy uzyndyǵy 1061,3 shaqyrym. Jobany iske asyrýǵa jergilikti kompanııalar men eńbek kúshi tartylǵan.
Eýrazııa damý banki 2006 jyldyń 12 qańtarynda qol qoıylǵan memleketaralyq kelisim negizinde qurylǵan. Bankti qurý bastamasyn Qazaqstan men Reseı prezıdentteri usynǵan.
Bank múshe memleketterdiń ekonomıkalyq ósimine járdemdesýge, olardyń arasyndaǵy saýda-ekonomıkalyq baılanystardy keńeıtýge jáne turaqty ekonomıkalyq damýǵa baǵyttalǵan halyqaralyq qarjy uıymy. Banktiń qatysýshy-memleketteri: Armenııa, Belarýs, Qazaqstan, Qyrǵyzstan, Reseı jáne Tájikstan.