EADB 2026 jylǵa deıin Qazaqstan ekonomıkasyna 3, 9 mlrd dollar ınvestıtsııa salýǵa nıetti

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi óńirlerdi, óńdeý ónerkásibin, qalalar ınfraqurylymyn jáne eldiń kólik-tranzıttik áleýetin damytýǵa baǵyttalǵan jobalar boıynsha Eýrazııalyq damý bankimen yntymaqtastyqqa múddeli, dep habarlaıdy atalǵan vedomstvonyń baspasóz qyzmeti.

Kezdesý barysynda Mınıstrge Eýrazııalyq damý bankiniń (EADB) jumys nátıjeleri jáne orta merzimdi josparlary týraly aqparat berildi. Atap aıtqanda, EADB-nyń 2022-2026 jyldarǵa arnalǵan strategııasynyń negizgi baǵyttary, sondaı-aq Qazaqstan óńirlerin áleýmettik-ekonomıkalyq damytýǵa baǵyttalǵan ónerkásip jáne kólik ınfraqurylymy salasynda iske asyrylǵan jáne aǵymdaǵy birlesken jobalar talqylandy.

Nıkolaı Podgýzov EADB sarapshylary Qazaqstannyń ekonomıkalyq ósim qarqyny joǵary bolatynyn boljap otyrǵanyn aıtty. Osyǵan baılanysty Bank «Soltústik – Ońtústik», «Batys Eýropa - Batys Qytaı» kólik dálizderin qalyptastyrýǵa, taýar ótkizetin biryńǵaı taýar jelisin qurýǵa jáne Ortalyq Azııanyń sý-energetıkalyq keshenin jańǵyrtýǵa baǵyttalǵan birqatar jobalardy iske asyrýǵa múddeli bolyp otyr. Jalpy EADB 2026 jylǵa deıin Qazaqstan ekonomıkasyna keminde 3,9 mlrd dollar ınvestıtsııa salýǵa nıetti.

Elimizdiń ınfraqurylymdyq nysandaryn damytýdaǵy Banktiń belsendi rólin atap ótken Mınıstr óńdeý ónerkásibi, qalalar ınfraqurylymy salasyndaǵy jobalardy iske asyrýdyń jáne eldiń kólik-tranzıttik áleýetin odan ári damytýdyń mańyzdylyǵyn atap ótti

EADB-ǵa Aqtaý jáne Pavlodar qalalarynda 53 óńirlik káriz tazartý júıesin salý jáne rekonstrýktsııalaý, jylýmen, sýmen jabdyqtaý jáne sý burý jelilerin keshendi jańǵyrtý sııaqty respýblıka úshin ózekti jobalarǵa qatysý usynyldy.