«E-zańnama» aqparattyq júıesi derekterin óńdeýge robot qoldanylady - Marat Beketaev

ASTANA. QazAqparat -«E-zańnama» aqparattyq júıesi jumysyna robot jumyldyrylady. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda QR Ádilet mınıstri Marat Beketaev aıtty, dep habarlaıdy QazAqparat tilshisi.

Onyń sózinshe, norma shyǵarmashylyǵy protsesindegi aqparattyq júıelerdi damytý boıynsha 2016 jyldan bastap «Ádilet» júıesiniń platformasynda memlekettik organdardyń taldamalyq jáne áleýmettik zertteýleriniń biryńǵaı derekqor bazasy quryldy. Qazirgi ýaqytta zertteý derekqorynda eki myńnan astam zertteýler bar. Oǵan memlekettik organdar men ulttyq kompanııa qyzmetkerleriniń qoljetimdiligi qamtamasyz etildi.

«Biz osy kontentti Májilis pen Senat depýtattarynyń jáne apparat qyzmetkerleriniń paıdalaný múmkindigin qamtamasyz etý týraly hattarǵa bastamashylyq jasadyq», -dedi ol.

Sondaı-aq, mınıstr «E-zańnama» aqparattyq júıesin ázirleý boıynsha júrgizilip jatqan jumystar týraly da atap ótti.

«Bul júıe ıntegratsııa arqyly ınternet resýrstardan jáne memlekettik organdardyń derekter qorynan keletin úlken derekterdi óńdeıdi - «Big data». Bolashaqta osy júıege jasandy ıntellekti robot qosý josparlanýda. Robot adamdar úshin zań jobasy normalaryn jazbaıtyndyǵyn birden aıtý kerek. Ol memlekettik organnyń suraýy boıynsha taldamalyq derekterdi óńdeıdi jáne normatıvtik quqyqtyq aktilerdiń jobasyn ázirleý úshin qajetti nátıje beredi», - dedi Marat Beketaev.