«E-Salyq Business» qosymshasy jetildiriledi

NUR-SULTAN. QazAqparat - Memlekettik kirister komıteti «e-Salyq Business» mobıldi qosymshasyn ázirlep, 2022 jyldyń 1 qańtarynan bastap iske qosty. Jańa tsıfrlyq sheshim jeke kásipkerlerge salyq mindettemesin oryndaýdy jeńildetedi jáne jańadan tirkelgen kásipkerlerge yńǵaıly. Bul týraly Qazaqstan Respýblıkasy Qarjy mınıstrliginiń Memlekettik kirister komıtetinen málim etti, habarlaıdy QazAqparat tilshisi.

Vedomstvo málimetinshe,Salyq kodeksiniń osy jyldan bastap qoldanysqa engizilgen erejelerine sáıkes atalǵan qosymsha arnaýly mobıldi qosymshany paıdalanýmen nemese ońaılatylǵan deklaratsııa negizinde arnaýly salyq rejımin qoldanatyn jeke kásipkerlerdiń salyq mindettemeleri men áleýmettik tólemder boıynsha mindettemelerin oryndaýyn ońaılatýǵa arnalǵan. Budan basqa, komıtetpen patent negizinde arnaýly salyq rejımin qoldanatyn kásipkerlerge arnalǵan qosymshanyń fýnktsıonalyn pılottyq joba aıasynda qoldaný múmkindigin kózdeıtin Qazaqstan Respýblıkasy Qarjy mınıstriniń buıryq jobasy ázirlendi.

Qazirgi ýaqytta buıryq jobasy usynystardy, onyń ishinde «Atameken» QR Ulttyq Kásipkerler Palatasynan alynǵan usynystardy, sondaı-aq jobaǵa sybaılas jemqorlyqqa qarsy saraptama júrgizý qorytyndylary boıynsha eskertýlerdi eskere otyryp pysyqtalady.

Qosymshanyń fýnktsıonaly jeke kásipker retinde tirkelýge, salyq rejımin tańdaýǵa jáne ózgertýge, chekter berýge, kirister tizilimin qalyptastyrýǵa jáne salyq jáne áleýmettik tólemder boıynsha mindettemelerdi qosymshamen avtomatty túrde esepteý úshin qyzmetkerlerdiń kiristeriniń esebin júrgizýge jáne ońaılatylǵan deklaratsııanyń tıisti joldaryn toltyrýǵa múmkindik beredi. Patent negizinde arnaýly salyq rejımin qoldanatyn kásipkerler «e-Salyq Business» mobıldi qosymshasynyń paıdalanýshylary bola otyryp, patent qunynyń esep-qısabyn usynýdan jáne tabys alǵanǵa deıin aldyn ala (avanspen) salyq jáne áleýmettik tólemderdi tóleýden bosatylady.

Qosymshamen eseptelgen jeke tabys jáne áleýmettik salyq somasyn Elektrondyq Úkimettiń tólem shlıýzinde jarııalanǵan Halyq bankiniń servısimen ıntegratsııany paıdalana otyryp, tikeleı mobıldi qosymshada

tóleýge bolady.

Budan basqa, kásipkerlerdiń yńǵaılylyǵy úshin qosymshada Salyq ámııanynyń servısteri (onyń ishinde bereshekti qaraý jáne óteý, artyq tólemdi basqarý boıynsha), memlekettik kirister organdarynyń birqatar habarlamalaryn alý, sondaı-aq, jeke kásipker qyzmetin ońaılatylǵan tártippen toqtatý servısi qoljetimdi. Qosymsha «Play Market», «App Store» jáne «App Gallery» alańdarynda qoljetimdi.

«Qosymsha múmkindigine qaraı osy jyly da fýnktsıonalyn keńeıtý bóliginde, onyń ishinde ótken jyldyń sońynda Aqmola jáne Jambyl oblystarynda ótkizilgen pılottyq jobaǵa qatysqan kásipkerlerdiń usynystary boıynsha jetildiriletin bolady. Mysal retinde, bıyl jeke kásipker qyzmetkerlerimen eńbek sharttaryn esepke alý boıynsha Eńbek jáne halyqty áleýmettik qorǵaý mınıstrliginiń tıisti aqparattyq júıesimen eńbek sharttary týraly aqparat almasý jumystaryn júrgizý josparlanǵan», - dep atap ótedi komıtetten.