«E-MÚFTIıAT» aqparattyq júıesi iske qosylady

NUR-SULTAN. QazAqparat - Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń bastamasymen «E-MÚFTIıAT» aqparattyq júıesi qurylady, dep habarlaıdy QazAqparat tilshisi.

QMDB baspasóz qyzmetiniń málimetinshe, búgin elordada ótken alqaly jıynda Bas múftıge atalǵan jobanyń jospary tanystyrylǵan. «E-MÚFTIıAT» aqparattyq júıesine ımam-moldalardyń bilim deńgeıi, ǵylymı derejesi, ulty, otbasy jaǵdaıy, oblystaǵy meshit sany jáne basqa da málimetter engizilmek.

«Qazir elektrondy tehnologııanyń damyǵan zamany. Álem elektrondy júıege kóshý úderisinde. Biz, din qyzmetkerleri bul tendentsııadan qalys qalmaýymyz qajet. «E-MÚFTIıAT» aqparattyq júıesi jumys tıimdiligin arttyrýmen qatar, QMDB Ortalyq apparatynyń kadr qyzmetin ońtaılandyrýǵa oń yqpal etedi. Sondyqtan osy jobany jetildirip, iske qosýdy tapsyramyn», – dep atap ótti QMDB Tóraǵasy Naýryzbaı qajy Taǵanuly.