E.Dosaev: Qazaqstannyń memlekettik saraptama júıesi tolyqtaı jańǵyrtylady

ASTANA. QazAqparat - Qazaqstannyń memlekettik saraptama júıesi tolyqtaı jańǵyrtylady. Bul týraly búgin Astanada QR Prezıdenti janyndaǵy Ortalyq kommýnıkatsııalar qyzmetinde Jańǵyrtý jónindegi Ulttyq komıssııanyń baspasóz máslıhatynda QR Ulttyq ekonomıka mınıstri Erbolat Dosaev málim etti.

«2016 jyldyń 1 qańtarynan bastap, jobalaý saraptamalarynyń 50 paıyzyn jeke sektorǵa berdik. 2019 jylǵa qaraı biz saraptama qyzmetiniń 90 paıyzyn jeke menshikke ótkizemiz. Tek memlekettik mańyzǵa ıe nysandarǵa saraptama jasaý memsektorda qalady», - dep atap ótti mınıstr.

QR UEM basshysynyń aıtýynsha, saraptama qyzmetimen aınalysatyn barlyq uıymdarǵa talap kúsheıtiledi.

«QR UEM-de 42 saraptama uıymy tirkelgen. Olarǵa qatysty talaptar naqty kórsetilgen. Sonymen qatar osy sarapshylardyń barlyǵyna tuńǵysh ret ákimshilik jáne qylmystyq jaýapkershilik engizilip otyr», - dedi E.Dosaev.

«Monıtorıng qorytyndysy boıynsha, naryqta básekege tótep bere alǵan kompanııalar qaısy ekenin biz kóretin bolamyz. Jalpy búginde shekteý joq, portalda talapqa saı keletin árbir bilikti kompanııa tirkele alady», - dedi ol.