Dzıýdodan Qazaqstan ulttyq quramasyna jańa bas bapker taǵaıyndaldy
«Maqsatymyz - qazaqstandyq dzıýdoshylardyń Azııa oıyndarynda, Azııa jáne Álem chempıonattary men Olımpıada oıyndarynda nátıjeli kúres kórsetip, úlken jetistikterge qol jetkizý. Osyndaı maqsatta bapkerler quramy ulttyq quramadaǵy dzıýdoshylardyń jattyǵýyn jiti qadaǵalap, dzıýdodan damyǵan memleketter qatarynda turý úshin aıanbaı jumys isteımiz», - deıdi, ulttyq quramanyń jańa bas bapkeri Aıdyn Smaǵulov.
Aıdyn Qudaıbergenuly - qazaqstandyq maman, dzıýdodan QR Eńbek sińirgen sport sheberi, QR Eńbek sińirgen jattyqtyrýshysy, «Dańq» ordeniniń ıegeri. 1976 jyly Almaty oblysynda dúnıege kelgen. Dzıýdodan birneshe halyqaralyq týrnırlerdiń jeńimpazy. Atap aıtqanda, Qazaqstan Respýblıkasynyń Chempıony, S. Jandosovty eske alýǵa arnalǵan halyqaralyq týrnırdiń 4 dúrkin jeńimpazy, J. Hamıtjanovty eske alýǵa arnalǵan halyqaralyq týrnır jeńimpazy (1999 j), Túrkııada ótken halyqaralyq týrnır jeńimpazy (1998), Ortalyq Azııa oıyndarynyń jeńimpazy (1999).
Bapkerlik qyzmetin 2005 jyly Almaty oblysynyń aǵa jattyqtyrýshysy bolyp bastaǵan. 2008-2010 jyldar aralyǵynda Qazaqstan jastar quramasynyń aǵa jattyqtyrýshysy, 2010-2012 jyldary «Jastar» sport kesheninde dırektordyń birinshi orynbasary, 2012-2017 jyldar aralyǵynda Qazaqstan ulttyq qurama komandasynda jattyqtyrýshy qyzmetin atqarǵan. Sonymen qatar, Aıdyn Smaǵulov 2000 jyly Qyrǵyzstan sapynda Sıdneıde ótken jazǵy Olımpıada oıyndaryna qatysyp, qola júldege ıe bolǵan.
Qazaqstan Dzıýdo federatsııasy 2012-2017 jyldar aralyǵynda dzıýdodan Qazaqstan ulttyq quramasynyń bas bapkeri qyzmetin atqarǵan Ermek Imambekovke elimizdegi dzıýdonyń damýyna úles qosyp, osy aralyqta álemdik arenada joǵary kórsetkishterge qol jetkizýde aıanbaı eńbek etkeni úshin alǵys bildirdi.