Dzıýdodan Qazaqstan chempıonaty: aralas komandalyq saıysta Almaty qalasy úzdik atandy

<p>AQTÓBE. KAZINFORM &ndash; Aqtóbe qalasynda dzıýdodan erler men áıelder arasynda Qazaqstan chempıonaty máresine jetti.</p>

Dúısenbi kúni aralas komandalyq saıysta jeńimpaz-júldegerler anyqtaldy.

Jekeleı jarysta Aqtóbe, Abaı oblysy jáne Astana qalasy ókilderi medal sany jóninen úzdik úshtikke ilikkenimen, olardyń birde-bireýi komandalyq básekede júldegerler qatarynan kórine almady.

Qola júlde úshin alǵashqy bolyp Qaraǵandy jáne Qyzylorda dzıýdoshylary tatamıge shyqty. Munda qaraǵandylyqtar 3:1 esebimen alǵa ketkenimen, qyzylordalyqtar tarazy basyn teńestirdi. Qosymsha beldesýde 90 kelige deıingi salmaqta qyzylordalyq Aıǵalı Qaldybek pen qaraǵandylyq Ulan Altaev qaıta synǵa tústi. Negizgi dodada Ulan Aıǵalıǵa ese jibergenimen, bul joly qarymta qaıtaryp, komandasyna jeńis áperdi – 4:3.

Sondaı-aq atyraýlyqtar Jambyl oblysy komandasyn 4:2 esebimen utyp, ekinshi qola júldege ıe boldy. Munda Atyraý sapynda Dana Ábdirova, Esmıgýl Kýıýlova jáne Aıymzada Dýmanqyzynyń óz komandasyna úsh upaı syılaǵanyn atap ótken jón.

Fınalda Almaty qalasy men Almaty oblysynyń ókilderi kúsh synasty. Munda esep 3:2 bolǵan mezette 70 keliden astam salmaqta Almaty qalasynan Aqerke Ramazanova men oblys atynan Ekaterına Tokareva shyqty. E.Tokareva jekeleı jarysta 70 kelige deıingi salmaqta chempıon atanǵanymen, Aqerkeniń salmaǵy áldeqaıda basym ekendigi baıqalyp turdy. Aldymen Ekaterına belsendi bolǵanymen, A.Ramazanova qarsylasyn taza jeńip ketti. Qorytyndy esep – 4:2, Almaty qalasy ókilderi aralas komandalyq saıysta chempıon atandy.

Eske sala keteıik, budan buryn dzıýdodan Qazaqstan chempıonatynda jekeleı jarysta Aqtóbe sportshylary kósh bastaǵanyn jazǵan edik.