Dzıýdodan halyqaralyq týrnırde Ǵusman Qyrǵyzbaev qarsylasyna ese jiberdi

ASTANA. QazAqparat - Ázerbaıjan astanasy Baký qalasynda Grand Slam serııasy boıynsha ótip jatqan týrnırde Ǵusman Qyrǵyzbaev qola julde úshin saıysta qarsylasyna ese jiberip qoıdy, dep habarlaıdy QazAqparat tilshisi.

Atalǵan týrnırde 66 kelide synǵa túsken Ǵusman Qyrǵyzbaev úşinshi oryn úshin saıysta qarsylasy ıspandyq Davıd Tornege ese jiberip qoıdy.

Aıta ketsek, atalǵan jarysta elimizdiń atynan 17 balýan quramaǵa ilikken. Olardyń qatarynda erlerden Baýyrjan Narbaev, Sherzod Davlatov (ekeýi de 60 kg), Ǵusman Qyrǵyzbaev, Almas Ǵalymov (ekeýi de 66 kg), Danııar Shamshaev (73 kg), Abylaıhan Jubanazar (81 kg), Ermahan Ánýarbekov (90 kg), Erqanat Moldagulov (100 kg), Jambyl Turǵynálıev (100 kg-nan joǵary) bar.

Al, áıelderde Ǵalııa Tynbaeva (48 kg), Nuraılym Sársenbek (48 kg), Dana Ábdirova (57 kg), Samalaı Erǵalıeva (63 kg), Esmıgúl Kýıýlova (63 kg), Arýna Jangeldına (78 kg), Nazerke Tileýhanova (78 kg), Kámıla Berliqash (78 kg-nan joǵary) synǵa túsedi.

Eske salsaq, budan buryn Samat Sársenuly djıý djıtsýdan álem chempıony atandy.