Dzıýdodan Azııa chempıonatynda qazaqstandyqtarǵa «altyn» buıyrmady

<p>ASTANA. KAZINFORM &ndash; Qytaıdyń Gonkong qalasynda ótip jatqan dzıýdodan Azııa chempıonatynan Qazaqstan tatamı sheberleri altyn ala almady.</p>

Búgin jarystyń úshinshi kúni qola medal úshin kúresken Arýna Jangeldına (-78 kg) men Nurlyhan Sharhan (-100 kg) qosymsha ýaqytta (golden score) qarsylastaryna ese jiberip, sary qurlyq dodasyn besinshi orynmen aıaqtady.

Osylaısha, Gonkongtaǵy Azııa chempıonatynda birde-bir balýanymyz fınalǵa shyǵa almady. Jartylaı fınalǵa shyqqan balýandardan tek úsh dzıýdoshy ǵana qola júldege ilikti.

Atap aıtsaq, keshe 63 keli salmaqta el namysyn qorǵaǵan Esmıgýl Kýıýlova qola júlde alǵan edi.

Al alǵashqy jarys kúni 66 keli salmaqta Janarys Rahmetqalı men 48 keli salmaqta Ǵalııa Tynybaeva úzdik úshtikten kóringen. Ekeýi de Azııa birinshiligindegi alǵashqy júldelerine qol jetkizdi.

Al Ulttyq quramanyń kóshbasshylary sanalatyn Abıba Ábýjaqynova, Eldos Smetov, Ǵusman Qyrǵyzbaevtar Azııa chempıonatynan quralaqan qaıtty.

Azııa chempıonatynyń jeńimpazy reıtıngte 700, kúmis júldeger 490 upaı alsa, úzdik úshinshi oryndarǵa qol jetkizgen dzıýdoshylarǵa 350 ball qosylady. Sonymen qatar qola júlde jolynda jeńilgen 2 dzıýdoshy 250 upaıǵa qol jetkizedi.

Endi erteń komandalyq báseke ótedi. Ulttyq quramamyz jartylaı fınal joldamasyn Úndistanmen sarapqa salady.