Dzıýdodan Azııa birinshiligine qatysatyn qazaqstandyq balýandar anyqtaldy

NUR-SULTAN. QazAqparat - Elordada 4-7 tamyz kúnderi ótetin dzıýdodan Azııa birinshiligine qatysatyn qazaqstandyq sportshylar belgili boldy, dep habarlaıdy QazAqparat tilshisi.

Qurlyqtyq dodaǵa Azııanyń 19 elinen 200-den astam balýan keledi dep kútilýde. Sportshylar 14 salmaqta synǵa túsedi. Olardyń qatarynda elimizdiń atynan qatysatyn 18 balýan bar.

Erler arasynda Maǵjan Shamshadın (60 keli), Baýyrjan Narbaev (60 keli), Ǵusman Qyrǵyzbaev (66 keli), Erlan Serikjanov (73 keli), Danııar Shamshaev (73 keli), Dıdar Hamza (90 keli), Nurlyhan Sharhan (100 kelige deıin), Islam Bozbaev (100 kelige deıin), Ádil Orazbaev (100 keliden joǵary) tatamı tórinde taıtalasqa túsedi.

Al áıelderde Abıba Ábýjakınova (48 keli), Ǵalııa Tynbaeva (48 keli), Gaýhar Irmagambetova (52 keli), Sevara Nıshanbaeva (57 keli), Prozrachnaıa Narynova (63 keli), Anastasııa Maıakova (70 keli), Arýna Jangeldına (78 kelige deıin), Kamıla Berlıkash (78 keliden joǵary), Nazgúl Maratova (78 keliden joǵary) jarys jolyna shyǵady.

Aıta ketsek, IJF erejesi boıynsha, Azııa chempıonatynyń jeńimpazdary men júldegerlerine Olımpıadalyq reıtıngte upaı sandary qosylady. Atap aıtqanda, jeńimpaz 700 upaıdy enshilese, 2 oryn ıegeri 490, al 3 orynǵa 350 upaıdan úlestiriledi.

Eske salsaq, áıelder kúresinen álem chempıonatynda Qazaqstan «qola» aldy.