Dzıýdo: Abylaıhan Jubanazar Azııa chempıonatynyń shırek fınalyna shyqty

<p>ASTANA. KAZINFORM &ndash; Qytaıdyń Gonkong qalasynda ótip jatqan dzıýdodan Azııa chempıonatynyń ekinshi jarys kúni bastaldy.</p>

Búgin birinshi bolyp beldesýge shyqqan 73 kelige deıingi salmaqtaǵy Asqar Narqulov Azııa chempıonatyndaǵy alǵashqy beldesýinde Taıland atynan synǵa túsetin Terada Masaıýkıdiń jaýyrynyn jerge tıgizgenimen, 2-aınalymynda súrindi. Bizdiń dzıýdoshy qosymsha ýaqytta (golden score) ózbekstandyq Mýrodjon ıÝldoshevqa ádis jasaýǵa múmkindik berip qoıdy.

Osy salmaqta synǵa túsken taǵy bir otandasymyz Danııar Shamshaev byltyr Chendýda ótken Ýnıversıadanyń chempıony, Parıjdegi Úlken dýlyǵa básekesiniń (2024 jyl) jeńimpazy Tatsýkı Isıharadan (Japonııa) jeńilip qaldy.

Osylaısha, 73 kg deıingi salmaqtaǵy qos sportshymyz chempıonatty erte aıaqtady.

Al 81 keli salmaqta el namysyn qorǵap jatqan Abylaıhan Jubanazar Azııa chempıonatyn 2-aınalymnan bastap, Mohıt Sehravatty (Úndistan) aıqyn basymdyqpen utty. Endi ol shırek fınalda Bahreın atynan synǵa túsetin Áskerbı Gerbekovpen kúresedi.

Aıta keteıik, Azııa chempıonatynyń jeńimpazy reıtıngte 700, kúmis júldeger 490 upaı alsa, qola medal alǵan 2 dzıýdoshyǵa 350 ball qosylady.

Atalǵan Saryqurlyq dodasynda 34 eldiń 262 tańdaýly tatamı sheberleri ózara kim myqtyny anyqtap jatyr.