Djordj Floıdtyń ólimine kináli AQSh polıtseıi 22,5 jylǵa sottaldy
Burynǵy polıtseıdi bıylǵy sáýir aıynda alqabıler soty D.Floıdtyń ólimine kináli dep tapqan bolatyn. Sol ýaqyttan beri ol qamaýda otyr.
Bul is Amerıkada jappaı narazylyq týdyryp, áleýmettik tolqynysqa alyp keldi.
Úkimdi jarııalamas buryn sýdıa Pıter Kahıll 270 aı nemese 22 jyldan astam túrme jazasyn taǵaıyndaýǵa ne túrtki bolǵanyn túsindirip ótti.
Onyń aıtýynsha, ol óziniń túıinin 22 bet paraqqa tizip jazǵan jáne qorytyndy «emotsııa nemese sımpatııaǵa negizdelip emes, zańdy anlızderge súıene otyryp jasalǵan».
Djordj Floıdtyń ólimine qatysty Derek Shovınnen bólek aıyp taǵy úsh polıtseıge taǵylǵan bolatyn. Olardyń árqaısysynyń kinásyn prokýror úkim shyǵar aldynda jarııa etti. Djeı Aleksander Kýng, Tý Tao jáne Tomas Leın árqaısysy eki bap boıynsha aıyptalýda: bul - aldyn ala josparlanbaǵan kisi óltirý faktisine qatysý jáne arandatý, qasaqana bolmaǵan kisi ólimi. Olarǵa qatysty sot 2020 jyldyń naýryzynda ótetini josparlanǵan.
Eske salaıyq, 2020 jyldyń 25 mamyrynda ońtústik Mınneapolıste 46 jastaǵy er adam dúkende temeki satyp alǵan. Satýshysy oǵan jalǵan aqsha tólendi dep eseptep, Floıd temekini qaıtarýdan bas tartqannan keıin polıtsııa shaqyrǵan.
Dúkenge kelgen tórt polıtseı onyń qolyna kisen taǵyp, kólikke otyrǵyzbaq bolǵan. Biraq Floıd qarsylyq kórsetken. Polıtseıler ony trotýarǵa jatqyzyp, D.Shovın onyń moınyn tizesimen basyp turǵan (prokýrordyń aıtýynsha 9 mınýt boıy). Qalǵan eki polıtseı Floıdty ustap turýǵa kómektesse, taǵy bir áriptesteri jaǵdaıǵa aralaspaq bolǵan adamdardy mańaıǵa jolatpaýǵa tyrysqan.
9 mınýt ishinde Djordj Floıd tynys ala almaı jatqanyn 20-dan astam ret aıtqan. Afroamerıkalyq azamat esin joǵaltqannan keıin ony polıtseıler kólikke tıegen. Bul oqıǵaǵa kýá bolǵandar jazyp alǵan vıdeoda kórinedi.
Bir saǵattan keıin aýrýhanada Floıd qaıtys boldy.