Djon Kerrı Irannan ýran jetkizýge atsalysqany úshin Qazaqstan men Reseıge alǵys bildirdi

ASTANA. QazAqparat - Qazaqstan men Reseı Irannan kememen kóp mólsherde tómen baıytylǵan ýran jóneltýde úlken rol atqardy, dep habarlady dúısenbi kúni AQSh memlekettik hatshysy Djon Kerrı.

Kerrı buǵan deıin 11,3 tonna ýran tıelgen keme Irannan Reseıge ketkeni jóninde habarlaǵan bolatyn, dep jazady RIA Novostı .

«Bul protseste kóptegen elder úlken rol atqardy. Reseı Birlesken is-qımyl josparynyń múshesi jáne tasymaldaý men ıadrolyq materıaldardyń qaýipsizdigin qamtamasyz etý isinde tájirıbesi mol el retinde Irannan ýran jóneltýde mańyzdy rol atqardy», - dedi Kerrı.

Ol sondaı-aq tabıǵı ýrandy jóneltýde Qazaqstannyń da aıtarlyqtaı úlesi bar ekendigin atap ótti.

«Men búgin Qazaqstannyń Syrtqy ister mınstri Erlan Ydyrysovpen sóılestim jáne ýran jetkizilimine kúsh salǵany úshin alǵys bildirdim. Bul rette Ázerbaıjan eliniń de úlesi bar», - dedi Kerrı.

Foto: Ramıl Sıtdıkov