Djo Baıden Túrkııa men Sırııada qaza tapqandarǵa kóńil aıtty

VAShINGTON. QazAqparat - AQSh Prezıdenti Djo Baıden Túrkııa men Sırııada qaza tapqandarǵa kóńil aıtyp, zardap shekken adamdarǵa barlyq qajetti kómekti kórsetýdi tapsyrdy, dep habarlaıdy QazAqparat tilshisi Aq úıdiń baspasóz qyzmetine silteme jasap.

AQSh Prezıdentiniń málimdemesinde Túrkııa men Sırııada myńdaǵan adamnyń ómirin qıǵan joıqyn jer silkinisi jaıly habardy zor kúızelispen qabyldaǵany aıtylǵan.

Djo Baıden jubaıy Djılmen birge jaqyndarynan aıyrylǵan, jaraqat alǵan jáne baspanasynan aıyrylǵandardyń barlyǵyna qaıǵyryp kóńil aıtty.

Amerıka prezıdenti AQSh ákimshiliginiń túrik bıligimen tyǵyz yntymaqtastyqta ekenin atap ótti. Dj. Baıdenniń tapsyrmasymen AQSh-tyń joǵary laýazymdy sheneýnikteri barlyq qajetti kómek kórsetýdi úılestirý úshin dereý túrik áriptesterimen baılanysqa shyqty.

Túrkııanyń izdeý-qutqarý qyzmetteri men zardap shekkenderge kómek kórsetý úshin AQSh-tan qutqarý toptary jiberildi. AQSh qoldaıtyn gýmanıtarlyq seriktester zilzaladan zardap shekken Sırııaǵa da kómek kórsetti.

Foto: IHA/REUTERS