Djo Baıden koronavırýs týraly jalǵan aqparat úshin Facebook jelisin synǵa aldy

VAShINGTON. QazAqparat – AQSh prezıdenti Djo Baıden Facebook áleýmettik jelisiniń koronavırýsqa qarsy vaktsına týraly jalǵan aqparatpen kúreste jetkilikti jumys istemegenin aıtyp, qatty synǵa aldy, dep habarlaıdy QazAqparat VVS-ge silteme jasap.

Jýrnalıster amerıkalyq kóshbasshydan vaktsınatsııa jáne Sovid-19 pandemııasyna qatysty jalǵan málimetter taratýdaǵy Facebook sııaqty kompanııalardyń róli týraly ne oılaıtynyn surady.

«Olar adamdardy óltirýde. Pandemııa qazir vaktsınalanbaǵan adamdar arasynda ǵana júrip jatyr», - dep jaýap berdi Baıden.

AQSh-tyń eresek turǵyndarynyń shamamen 67,9% - y koronavırýsqa qarsy vaktsınalardyń biriniń alǵashqy dozasyn aldy, al 59,2% - y tolyq vaktsınatsııadan ótti. Biraq kóptegen adam ekpe almaı jatyr, óıtkeni olar vaktsınatsııaǵa qarsy.

Beısenbi kúni AQSh-ta 33 myńnan astam jańa jaǵdaı tirkeldi, al jeti kún ishinde aýrý juqtyrýshylardyń ortasha sany aldyńǵy aptamen salystyrǵanda 70%-ǵa artty.

Bul rette aýrýhanalardaǵy patsıentter 36%-ǵa, al ólim-jitim 26%-ǵa kóp boldy (bir apta ishinde qaıtys bolǵandardyń ortasha táýliktik sany 211 adamdy qurady).

Aq úıdiń Koronavırýspen kúres jónindegi úılestirýshisi Djeff Zıents aýrýǵa shaldyǵýshylar men ólim jaǵdaılarynyń artýy adamdardyń vaktsınatsııadan bas tartýymen baılanysty ekenin aıtty.

Juma kúni Amerıkanyń Aýrýlardy baqylaý jáne aldyn alý ortalyqtarynyń (CDC) basshysy Roshel Valenskı: «Dál qazir bul pandemııa vaktsınalanbaǵandar pandemııasyna aınalady dep aıtýǵa bolady», - dep qorytyndylady.

Vaktsınatsııaǵa qarsylyq tanytqandar áleýmettik jelilerde aqparat alý arqyly vaktsınatsııadan bas tartýda. Sonymen qatar, Respýblıkalyq partııanyń keıbir saıasatkerleri vaktsınatsııa arqyly bılik AQSh turǵyndaryn baqylaýǵa tyrysady dep málimdep jatyr.

Osy jyldyń naýryz aıynda Center for Countering Digital Hate úkimettik emes uıymy jarııalaǵan zertteýge sáıkes, vaktsınatsııanyń qarsylastary Facebook, YouTube, Instagram jáne Twitter-de 59 mıllıonnan astam adam oqyǵan posttardy jarııalaǵan. «Osylaısha, olar «antıvakserler úshin eń úlken jáne mańyzdy áleýmettik medıa platformalarǵa aınaldy», - delingen baıandamada.

Áleýmettik jelilerde ne jazylǵan?

Facebook resmı ókili Kevın Makallıster kompanııa «faktilermen rastalmaǵan aıyptaýlarǵa alańdamaıdy» dedi.

«Biz kovıd týraly jalǵan aqparaty bar 18 mıllıonnan astam jazbany óshirdik jáne erejelerdi únemi buzatyn akkaýnttardy buǵattadyq», - delingen áleýmettik jeli taratqan málimdemede.

Osy jyldyń kókteminde Facebook basshysy Mark Tsýkerberg, sondaı-aq Google jáne Twitter basshylary Sýndar Pıchaı men Djek Dorsı amerıkalyq kongressmenderdiń jelidegi jalǵan aqparat týraly suraqtaryna jaýap berdi.

Dorsı Tvıtter jazbalardy moderatsııalaýdy jaqtaıtynyn, al Pıchaı YouTube koronavırýs týraly jalǵan aqparatty únemi alyp tastaıtynyn jáne vaktsınalar týraly dáleldengen jáne ǵylymı málimetterdi taratýda mańyzdy ról atqaratynyn aıtty.

Aq úıdiń resmı ókili Djen Psakı áleýmettik jeliler jalǵan aqparatpen kúresýge tyrysyp jatqanyn moıyndady, biraq olar neǵurlym batyl áreket etýi kerek ekenin atap ótti.

«Olardyń qandaı da bir qadam jasaǵany anyq. Biraq kóp nárseni jasaý kerek ekeni ras», - dedi ol.