Djo Baıden Kongres qabyldaǵan ýaqytsha bıýdjet týraly zań jobasyna qol qoıdy

<p>ASTANA. KAZINFORM &mdash; Djo Baıden buǵan deıin Kongres qabyldaǵan Úkimetti naýryz aıynyń sońyna deıin qarjylandyrý týraly zań jobasyna qol qoıdy, dep habarlaıdy Kazinform <a href="https://www.golosameriki.com/a/us-president-joe-biden-signs-temporary-budget-bill/7909710.html" target="_blank" rel="noopener">&laquo;Amerıka daýysyna&raquo;</a> silteme jasaı otyryp.</p>

Aq úı saıtyndaǵy málimetke sensek, AQSh Prezıdenti bul zań jobasyna shatdaýn — Úkimet jumysynyń ýaqytsha toqtap qalýyna jol bermes úshin qol qoıǵan.

Buǵan deıin, atap aıtqanda senbige qaraǵan túni zań jobasyn Senat maquldaǵan edi: 85 depýtat qoldap daýys bergen. Odan buryn Kongrestiń tómengi palatasynda da daýys berý júrgizildi. Ókilder palatasynyń 366 múshesi zań jobasyn qoldaıtynyn bildirgen.

Qabyldanǵan zań Úkimetti naýryz aıynyń sońyna deıin qarjylandyrýdy, tabıǵat apaty bolǵan jaǵdaıda zardap shegýshilerge berý maqsatynda 100 mlrd dollar, sondaı-aq aýyl sharýashylyǵy salasyndaǵy kásipkerlerge qoldaý kórsetý úshin 10 mlrd dollar bólýdi kózdeıdi.
Úkimet jumysynyń toqtaýy kóptegen memlekettik qyzmetterdiń tizbegin buzar edi. Quqyq qorǵaý organdary, AQSh-tyń ulttyq parkter qyzmeti toqtap, mıllıondaǵan federaldyq qyzmetshige jalaqy berilmeı qalar edi.

Týrızm salasyndaǵy U.S. Travel Association qaýymdastyǵy Úkimet jumysynyń toqtaýy áýe jelileri, qonaq úıler jáne ózge de kompanııalarǵa aptasyna 1 mlrd dollar shyǵyn ákelip, Rojdestvo qarsańynda halyqty tyǵyryqqa tireýi yqtımal bolǵanyn málimdedi.

Tarıhta AQSh Úkimeti jumysynyń eń uzaq úzilisi 2018 jyldyń jeltoqsany men 2019 jyldyń qańtary aralyǵynda bolyp, 34 kúnge sozylǵan. Ol kezde Tramp AQSh pen Meksıkanyń arasynda tosqaýyl qabyrǵa salýǵa kemi birneshe mlrd dollar bólý qarastyrylmaǵan kez kelgen qarjy bólý týraly zań jobasyna qol qoıýdan bas tartqan bolatyn.

Eske salsaq, osyǵan deıin Tramp Kanadany 51-shi shtat etip qalyptastyrý ıdeıasyn alǵa tartyp otyrǵany habarlandy.