Djo Baıden Kalıfornııadaǵy orman órtine baılanysty Italııaǵa saparyn keıinge shegerdi

<p>ASTANA. KAZINFORM &ndash; AQSh Prezıdenti Djozef Baıden Kalıfornııadaǵy orman órtine &laquo;federaldy aýqymdaǵy tolyq sharalardy basqarýǵa&raquo; kóńil bólý úshin josparlanǵan Italııa saparynan bas tartty, dep jazady <a href="https://russian.news.cn/20250109/5ec0a0047f7143ecaa64e303515fe6c3/c.html" target="_blank" rel="noopener">Sınhýa.</a></p>

Bul týraly Aq úıdiń resmı ókili sársenbi keshinde jarııalanǵan málimdemesinde habarlady.

Sol kúni Djozef Baıden Kalıfornııada iri apat jaǵdaıyn jarııalaýdy maquldap, shtat, taıpalyq jáne jergilikti bıliktiń orman órti men qatty jelden zardap shekken aýdandardy qalpyna keltirý sharalaryna qosymsha federaldy kómek kórsetýge buıryq berdi. 

Aq úıdiń málimdemesinde kómek ýaqytsha baspana men úılerdi jóndeýge granttar, saqtandyrylmaǵan múlik shyǵyndaryn óteýge arzan nesıe jáne apat saldarynan zardap shekken jeke tulǵalar men bıznes ıelerine kómektesýge arnalǵan basqa da baǵdarlamalardy qamtýy múmkin ekeni aıtylǵan.

— Biz órtti toqtatý jáne qalpyna keltirý úshin qajet nárseniń bárin jasaýǵa daıynbyz. Biraq bul óte uzaq jol bolatynyn bilemiz, — dep jazdy Djozef Baıden X áleýmettik jelisinde. 

Kalıfornııanyń eń tyǵyz qonystanǵan okrýgi — Los-Andjeleste birneshe iri orman órti bolyp, jergilikti bıliktiń habarlaýynsha, keminde bes adamnyń ómirin qıyp, 1100 ǵımaratqa zaqym keltirdi. Kalıfornııa gýbernatory Gevın Nıýsom seısenbide tótenshe jaǵdaı jarııalady. Órttiń jyldam taralýyna baılanysty ondaǵan myń adam evakýatsııalanýǵa májbúr boldy.

Buǵan deıin habarlanǵandaı, Baıden Kalıfornııada orman órtine baılanysty apatty jaǵdaı jarııalady.