Djeıkobs Golovkınmen taǵy da judyryqtasqysy keledi

ASTANA. QazAqparat - Amerıkalyq boksshy Denıel Djeıkobs (35-2, 29 KO) qazaqstandyq Gennadıı Golovkınmen (38-1-1, 34 KO) bolatyn revansh jóninde pikir bildirdi, dep habarlaıdy QazAqparat Sports.kz-ke silteme jasap.

«Golovkınge aıtaryń bar ma deımisiz? Joq, meniń Gennadııge aıtar ýájim joq. Ol tamasha jigit, maǵan unaıdy. Men - chempıonmyn, sondyqtan taǵy da qaıtadan jekpe-jekke shyǵa alamyz. Men taıaý ýaqytta sol aıqastyń bolǵanyn qalaımyn. Úzdiktermen, chempıondarmen judyryqtasa almasam, onda soǵan úmitkerlermen aıqasýyma bolady ǵoı», - dedi Djeıkobs.

Eske sala keteıik, Golovkın men Djeıkobs ótken jyldyń naýryzynda Nıý-Iorkte jekpe-jeke shyqqan bolatyn. Kezdesý qazaqstandyq boksshynyń jeńisimen aıaqtaldy. Degenmen, kóptegen sarapshylar men jankúıerlerdiń pikirinshe, bul - Golovkınniń mansabyndaǵy erekshe aıqastardyń biri. Óıtkeni, onyń qarsylasy Gennadııdiń álsiz tustaryn taýyp, «qubyjyq» keıpiniń byt-shytyn shyǵardy.