Djeıkobs Golovkınmen kezdesýi múmkin ekenin rastady

ASTANA. QazAqparat - Amerıkalyq boksshy Denıel Djeıkobs Fighthype.com saıtyna bergen suhbatynda qazaqstandyq boksshy Gennadıı Golovkınmen bolýy yqtımal kezdesý týraly aıtyp berdi, dep habarlaıdy Sports.kz.

«Biz qazir ózara kelissózder júrgizip jatyrmyz. Bul ispen bizdiń promoýterlerimiz aınalysýda. Ázirge bári durys, eger ekeýara kelissózder osy qalpymen jalǵasa beretin bolsa, biz kelesi jyldyń naýryzynda kezdesip qalýymyz múmkin. Men solaı bolsa eken dep úmittenemin. Men bul kezdesýdi jan-tánimmen kútip júrmin. Endi onyń qalaı bolaryn ýaqyt kórseter»,-dedi Djeıkobs.

Osyǵan deıin Golovkınniń bapkeri Abel Sanches Djeıkobs pen Golovkınniń kezdesýi aqpanda ne naýryzda ótýi múmkindigin aıtqan bolatyn. Áýelde Golovkın-Djeıkobs kezdesýi 10 jeltoqsanda ótedi dep josparlanǵan bolatyn. Alaıda, taraptar kezdesýdiń qaıda ótetini jáne kiristerdiń qandaı mólsherde bólinetinine baılanysty máseleni sheshe almady.