Djekı Channyń Qazaqstandaǵy bolashaq jobalary
Sol kezde Dımash óz ınstagram paraqshasyna: «Búgin meniń ómirimde tarıxı este qalatyn erekshe kún! Ataqty akter Djekı Chan myrza meni teledıdardan kórip, kezdesýge shaqyrdy! Kezdesýde akter maǵan óziniń eksklıýzıvti kúrteshesin jáne arnaıy fırmalyq án tyńdaý qurylǵysyn syıǵa tartty! Al men akterge qazaqtyń shapanyn jaýyp, dombyrany syıǵa tarttym! Dombyramen bir kúı shertip berýimdi ótingen Djekı Chanǵa Nurǵısanyń "Álqısasynan" shashý shashtym! Óz kezeginde akter maǵan sońǵy "Kung Fu Yoga" kınokartınasyndaǵy bı qımyldaryn úıretti. Bala kezimnen beri kele jatqan súıikti akterim maǵan óz aqyl keńesterin berip, shyǵarmashylyǵymdy baqylaıtynyn aıtty. Sóz sońynda, barsha Qazaqstan xalqyn jańa jyl merekesimen quttyqtap, ádemi lebiz-tilegin bildirdi! Kelesi kezdesýdi asyǵa kútemiz! Armandar oryndalady!», - dep jazdy.
Arada tórt aı ótkennen keıin Djekı Chan men Dımash Qudaıbergen endi Astanadaǵy Qytaı kınosy festıvaliniń ashylý rásiminde qaıta kezdesti. Bul joly tanymal akter elordaǵa arnaıy qonaq retinde keldi. Belgili kınoprodıýser kınofestıvaliniń ashylý saltanatyna arnalǵan baspasóz máslıhatynda QazAqparat agenttiginiń suraǵyna: «Teledıdardan Dımashtyń keremet daýysyn estip, jas talanttyń ónerine tánti boldym. Keıin ol meniń fanatym ekenin bildim. Árıne, men ony kıno salasynda óte tamasha akter bolady dep oılaımyn», - dep jaýap qaıtardy.
Sonymen qatar Djekı Chan Qazaqstanda fılm túsirýge nıetti ekenin jaıyp saldy. Shynyn aıtqanda, osyǵan deıin ol Qazaqstanǵa kelip, kınematografııamen aınalysýdy armandaǵan eken. Alaıda ýaqyttyń tapshylyǵynan, búginge deıin bul armanyn júzege asyra almapty. Bolashaqta Qazaqstanǵa mindetti túrde kelip, osy saladaǵy eńbegin iske asyrmaq oıy bar eken.
Budan bólek ol tilshiler saýalyna jaýap berý kezinde jetistikke qalaı jetkenin aıtyp berdi. «Árıne, men birden óner juldyzy atanǵan joqpyn, qazirgi deńgeıime birtindep keldim. ıAǵnı eń tómennen ár qadam saıyn joǵarylaı berdim. Sondyqtan da árbir adamnyń jaǵdaıyn jaqsy túsinemin, sáıkesinshe, ár adamnyń jumysyna qurmetpen qaraımyn», - dep toqtaldy tanymal óner juldyzy.
Osy oraıda ol tabysqa eń bastysy kúsh-jiger men jankúıerlerdiń qoldaýy arqasynda, sondaı-aq únemi janynan tabylatyn komandasynyń kómegimen jetkenin aıtty.
«Álem elderinde jankúıerlerim meniń fılmderimdi tamashalap júrgenin bilemin. Osy rette týyndylarym arqyly óz álemimdi tanystyrýǵa tyrysyp kelemin. Atap aıtqanda, meniń fılmderimde tildik kedergiler bolmaǵandyqtan, olardyń barlyǵynyń maǵynasyn esh qıyndyqsyz túsine alasyzdar», - dedi ol.
Munymen qosa, tilshiler qaýymy odan kýng-fý mektebi jaıynda surady. Bul turǵyda Djekı Chan qazir Beıjińde kýng-fý boıynsha jattyǵýlar júrip jatqandyǵyn, aldaǵy jyly ondaǵy mektep resmı túrde ashylatyndyǵyn málim etti.
«Sondyqtan da osy múmkindikti paıdalana otyryp, osy ónerge qyzyǵýshylyq tanytqan adamdar Beıjińge kelip, kýng-fýdy meńgerýdi ótiner edim. Búginde osy saladaǵy jumystarymyz jańadan qarqyn alýda, osy oraıda bolashaqta barsha álemde mektepterdi ashýǵa nıettimin. Múmkin Qazaqstanda da kýng-fý mektebi ashylyp qalar», - dedi tanymal akter.
Aıtpaqshy, Qytaı kınosy festıvaliniń saltanatty ashylýynda Djekı Chan men Dımash sahnada án shyrqady. Tanymal akter qonaqkáde retinde qytaı tilinde «Otan» ánin shyrqady. Ol bul án otanshyldyqqa baýlıtynyn, sondaı-aq barlyq adam óz otanyn súıý kerek ekendigin jetkizdi. Óz kezeginde qazaqstandyq ánshi sahnaǵa shyǵyp, «Singer» baıqaýynda shyrqaǵan qytaısha «Kúzgi muń» ánin aıtyp berdi.
Búgingi sharaǵa Qazaqstan men Qytaı birlesip túsiretin «Kompozıtor» fılminiń ujymy da arnaıy keldi.
«Qazaqstan men Qytaı birlesip túsiretin «Kompozıtor» fılminiń ujymymen kezdestim, kelesi rette Qazaqstanda túsiriletin týyndy meniki bolady dep senemin», - dedi Djekı Chan.
Eske sala keteıik, Sh.Aımanov atyndaǵy «Qazaqfılm» kınostýdııasy Qytaı kınematografısterimen birlesip «Kompozıtor» (jumys ataýy) atty fılmdi túsirýdi qolǵa aldy. Atalǵan fılm álemdik ónerge eleýli úles qosqan Qytaıdyń tanymal kompozıtory Sı Sınhaıdyń ómiri men óner jolyna arnalmaq. Ekinshi dúnıejúzilik soǵys jyldarynda (1941-1943 jyldar aralyǵynda) kompozıtor Qazaqstanda turyp, qazaqtyń talantty kompozıtory Baqytjan Baıqadamovpen dos bolǵan. Kartına eki el arasyndaǵy yntymaqtastyq pen kompozıtorlardyń dostyǵy týraly syr shertedi.
2016 jyly 2 qarashada «Qazaqfılm» kınostýdııasy jáne Qytaıdyń Shineworks kınokompanııasy arasynda «Kompozıtor» fılmin birlesip shyǵarý jáne qarjylandyrý, sonymen qatar birlesip prokatqa shyǵarý jóninde kelisimge qol qoıyldy. 2016 jyldyń jeltoqsan aıynan bastap fılm daıyndyq kezeńge ótken bolatyn. Kartınanyń túsirý jumystary 2017 jyly bastalyp, túsirilimderdiń negizgi bóligi Qazaqstanda ótedi.
Aıta ketý kerek, 7-18 maýsym aralyǵynda Astanada ótetin Qytaı kınosy festıvali aıasynda elordalyqtar men qala qonaqtary «Іle ózeni», «Shynaıy mahabbat», «Gúlim», «Qaterli isik myrza, ketińiz», «Qasqyr totemi» syndy týyndylardy tamashalaı alady.
Festıval Qazaqstandaǵy kúnderi QR Aqparat jáne kommýnıkatsııa mınıstrligi men QR Mádenıet jáne sport mınıstrliginiń qoldaýymen ótýde. Sharany «Qazaqstan» Respýblıkalyq teleradıokorporatsııasy men QHR Baspasóz, baspa, radıo, kıno jáne televızııa isi jónindegi memlekettik basqarmasy uıymdastyrdy.