Dúısenova ShQO jurtshylyǵymen densaýlyq saqtaýdy damytý máselelerin talqylady

<p>ASTANA. KAZINFORM &mdash; Shyǵys Qazaqstan oblysyna jumys sapary aıasynda QR Premer-mınıstriniń orynbasary Tamara Dúısenova Rıdder qalasynyń negizgi áleýmettik nysandaryna bardy. Bul týraly Úkimettiń baspasóz qyzmeti málim etti.</p>

Densaýlyq saqtaýdy jańǵyrtý jáne sporttyq ınfraqurylymdy damytý máselelerine basty nazar aýdaryldy.

Vıtse-premer Rıdder qalasynyń turǵyndary úshin kópten kútken joba bolyp tabylatyn kópsalaly aýrýhana kesheniniń qurylys barysymen tanysty. Qurylysty qarjylandyrý tolyǵymen qamtamasyz etildi: Memleket basshysynyń tapsyrmasy boıynsha «Zańsyz ıemdenilgen aktıvterdi memleketke qaıtarý týraly» Zań sheńberinde qaıtarylǵan qarajattan 28,2 mlrd teńge bólindi. Bul sheshim jergilikti turǵyndardy erekshe qýantýda.

«Bizdiń qalamyz úshin bul keshen aýadaı qajet edi. Qoldanystaǵy ǵımarattar ábden eskirgen. Endi zamanaýı keshen qurylysy aıaqtalsa, bizge kórsetiler qyzmettiń sapasy edáýir artatyn bolady. Memleket basshysyna alǵysymyzdy bildiremiz», — dedi qala turǵyny Sabır Kagarmanov.

Merdiger uıymdardyń ókilderi qazirgi ýaqytta sátti sheshilgen qarjylyq qıyndyqtarǵa qaramastan, nysandaǵy qurylys jumystary úzilissiz jalǵasqanyn aıtty.

«Memleket basshysy densaýlyq saqtaý salasyna erekshe kóńil bólýde. Aýrýhana kesheniniń qurylysyn aıaqtaýǵa qarjy qarastyryldy. Endi jergilikti ákimdik jumystyń sapaly júrgizilýin qadaǵalaýy kerek. Nysan medıtsınalyq qyzmet sapasyn arttyrýǵa yqpal etetini sózsiz. Onda bilikti mamandardy jumyldyrý qajet», — dep atap ótti Tamara Dúısenova.

Foto: Úkimet

Medıtsınalyq qaýymdastyq ókilderimen ótken keńeste óńirdiń densaýlyq saqtaý júıesin damytý máseleleri talqylandy. Kezdesýde qazirgi kórsetkishter men qol jetkizilgen nátıjelerge taldaý júrgizildi. Vıtse-premer aýrýdy erte dıagnostıkalaýdyń joǵary sapasyn qamtamasyz etýdiń mańyzyna toqtaldy. Mindetti medıtsınalyq saqtandyrý júıesine engizilgen azamattar úshin medıtsınalyq qyzmetterdiń qoljetimdi bolýyn qamtamasyz etýge erekshe nazar aýdaryldy.

Sapar aıasynda Premer-mınıstrdiń orynbasary taǵy bir mańyzdy nysan – elimizdegi qysqy sport túrleri boıynsha olımpıadalyq rezervtiń jalǵyz respýblıkalyq mamandandyrylǵan mektep-ınternatyna bardy. Bul 250 oqýshyǵa arnalǵan biregeı oqý orny. Munda sportshylardy daıarlaýmen 179 bilikti maman aınalysady. Mektep-ınternattyń jumysymen tanysqan Tamara Dúısenova sport uıymdarynyń óńirlik basshylarymen keńes ótkizdi. Kezdesý barysynda sport salasyn damytýdaǵy aldaǵy ózgerister talqylandy.

Týrızm jáne sport vıtse-mınıstri Serik Jarasbaev qazir Parlament qabyrǵasynda qarastyrylyp jatqan salalyq zańdaǵy negizgi tarmaqtar týraly baıandady. Onyń ishinde basym sport túrlerin damytý, salany basqarý ádisi, tsıfrlandyrý jáne balalar men jasóspirimder sport mektepterindegi qarjylandyrý sekildi birqatar máseleler qamtylǵan.

Vıtse-mınıstr reformalar sporttyq jetistikterdi arttyrý, qarjylyq ashyqtyqty qamtamasyz etý jáne jattyqtyrýshylar quramynyń jalaqysyn ulǵaıtý úshin resýrstardy shoǵyrlandyrýǵa baǵyttalǵanyn atap ótti.

Qorytyndylaı kele, Tamara Dúısenova talqylanatyn máseleler muqııat jáne jan-jaqty taldanatynyna senim bildirdi.

Eske salsaq, buǵan deıin Tamara Dúısenova Qaraǵandy oblysyndaǵy bilim jáne medıtsına salasynyń qyzmetkerlerimen kezdeskeni habarlandy.