Dúısenbaı Turǵanov: Energııa tapshylyǵynan kollaps týyndaýy múmkin

NUR-SULTAN. QazAqparat - «Orta Azııalyq elektr energetıkalyq korporatsııasy» AQ bas dırektorynyń birinshi orynbasary Dúısenbaı Turǵanov elimizde elektr energııasynyń qymbattaýyna qatysty pikirin bildirdi, dep habarlaıdy QazAqparat tilshisi.

«Elektr energııasyn óndirýshi kompanııalardyń barlyq shyǵystary shyǵyndy bolyp keledi. Shyǵystary kiristen áldeqaıda kóp. Eń aldymen, bul otyn baǵasynyń artýyna, otyndy tasymaldaýǵa baılanysty. Ekinshiden, úsh jyldan beri elektr energııasynyń tarıfi kóterilgen joq. Ótken jyldyń qazanynda tarıf azdap, ortasha eseppen 8 paıyzǵa artqan edi. Alaıda, ol qural-jabdyqtardy sapaly daıyndaý, olardyń tozýyn azaıtý úshin aıtarlyqtaı áser bere almady. ıAǵnı, tarıftiń bul kóterilýi elektr stansalarynyń negizgi qural-jabdyqtarynyń tehnıkalyq jaǵdaıyna áser etpedi», - dedi ol.

Onyń atap ótýinshe, kez kelgen máselede der ýaqytynda tıimdi sharalar qabyldaý qajet.

«Qazirgi ýaqytta kúz-qysqy maýsymǵa daıyndyq júrgizip jatyrmyz. Koronavırýs ınfektsııasynan týyndaǵan problemalarǵa baılanysty stansa qural-jabdyqtaryn kúzgi-qysqy merzimge daıyndap úlgermeımiz. Al sonyń saldarynan elektr energııasymen qamtýda irkilester oryn alyp, jetpeı qalýy da múmkin. Jyldan jylǵa jańartýǵa, jańǵyrtýǵa jáne jóndeýge qarjy salýymyz qajet. Al ol tarıf esebinen ǵana múmkin bolmaq. Tarıfti kótermesek, qazirgi shyǵyndardyń ǵana ornyn jaýyp otyra bersek, onda elektr energııasy salasynyń qural-jabdyqtary isten shyǵýy múmkin. Sol kezde barlyǵy jaryqtyń, ınternettiń, jylýdyń joq ekendigin anyq sezinip, kollaps oryn alady», - dedi Dúısenbaı Turǵanov.

Sonymen qatar ol elektr energııasy salasyndaǵy tehnıkalar men qural-jabdyqtar máńgilik emestigin, olardy jańartyp ári jóndep otyrý qajettigin basa aıtty.

«Úkimet 2020 jyldyń sońyna deıin ekonomıkalyq ósim jónindegi keshendi jospardy qabyldady. Bul keshendi josparǵa elektr energetıkasy salasy kirmeı qalyp otyr. Energetıka salasynda eshqandaı qoldaý sharasy joq. Sondyqtan da tarıfti osylaı kóterýge májbúr shyǵar. Eger jeńildikpen nesıe berip, salyqtyq artyqshylyq usynǵanda, árıne, tarıfti kótermeýge de bolar ma edi... Jaryq janyp tursa, biz ony máńgilikteı kóremiz. Alaıda ol máńgilik emes qoı. Bul salaǵa jumyldyrylǵan barlyq tehnıka men qural-jabdyqtar da máńgilik emes. Olar da jańartýdy jáne jóndeýdi qajet etedi», - dedi Dúısenbaı Turǵanov.

Buǵan deıin habarlaǵanymyzdaı, 1 shildeden bastap Qazaqstanda elektr energııasy qymbattaıdy.