Dúıim jurtqa qaıǵyra kóńil aıtamyn – Dımash Qudaıbergen

ASTANA. QazAqparat – Ánshi Dımash Qudaıbergen Abaı oblysyndaǵy alapat órtte ormanshylardyń qaza bolýyna baılanysty kóńil aıtty, dep habarlaıdy QazAqpaprat.

«Semeı ormany» tabıǵı rezarvatyndaǵy órt saldarynan qaza tapqan orman sharýashylyǵy qyzmetkerleriniń otbasyna jáne barsha dúıim jurtqa qaıǵyryp kóńil aıtamyn. Elimiz aman, jurtymyz tynysh bolsyn! Alapat órt tezirek toqtasyn!», - dep jazdy ánshi Instagram-daǵy paraqshasynda.

Eske salaıyq, «Semeı» ormany rezervatynda órt 8 maýsym kúni shyqqan bolatyn.
Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Tilsiz jaýdy aýyzdyqtaýǵa jumyldyrylǵan 14 ormanshy qaza boldy. Barlyǵy memlekettik nagradaǵa usynyldy.

Semeı ormanyndaǵy órt faktisi boıynsha qylmystyq is qozǵaldy.

Úsh aýyldyń turǵyndary qaýipsiz jerge evakýatsııalandy.

10 maýsym kúni túste jalyn sharpyǵan aýmaq 60 myń gektardan asyp ketkeni habarlandy.

Keshe Prezıdent Qasym-Jomart Toqaev jumys saparymen Abaı oblysyna bardy.

Memleket basshysy orman alqaptaryndaǵy órt sóndirý jumystarymen tanysyp, shuǵyl áreket etý shtabynyń otyrysyn ótkizdi jáne órt kezinde qaza tapqan orman sharýashylyǵy qyzmetkerleriniń týystarymen kezdesti.

12 maýsym Semeı ormanyndaǵy alapat órtten qaza bolǵandardy aza tutý kúni bolyp jarııalandy.

Búgin Abaı oblysynyń polıtsııasy traktorymen órt sóndirýge ketken taǵy bir adamnyń izdestirilip jatqanyn habarlady.