Dýshanbede Tájikstan men Qazaqstan kásipkerleriniń bıznes-forýmy ótedi
Tájikstan Respýblıkasynyń Saýda-ónerkásip palatasynyń málimetinshe, bıznes-forýmǵa Qazaqstannan 15-ke jýyq óndirýshi qatysady. Sonyń ishinde tamaq ónerkásibi (sary maı, un, makaron, kondıterlik ónimder, et ónimderi), aýyl sharýashylyǵy (mal azyǵyn óndirý), telekommýnıkatsııa jabdyqtary, jelilik kommýtator, transformator, fosfat tyńaıtqyshtaryn óndirý sııaqty túrli salalar bar. Sonymen qatar forýmda eldiń taý-ken jáne geologııalyq barlaý ónerkásibi de tanystyrylady.
Bul eki memleket kásipkerleriniń birinshi bıznes-forýmy emes. 2019 jyldyń shildesinde jáne 2021 jyldyń naýryzynda Dýshanbede tájik-qazaq kásipkerleriniń bıznes forýmy ótken.
Sonymen qatar 2023 jylǵy 3 mamyrda Tájikstan Respýblıkasynyń Prezıdenti Emomalı Rahmonnyń Qazaqstanǵa memlekettik sapary aıasynda Astanada Qazaqstan jáne Tájikstan bıznes-forýmy ótkizildi. Onyń aıasynda 2,6 mlrd dollardan astam somany quraıtyn 40-qa jýyq birlesken qujatqa qol qoıyldy.
Eske salsaq, 25-26 tamyz kúnderi Tájikstan Prezıdenti Emomalı Rahmon Qazaqstanǵa jumys saparymen kelgen edi. Memleket basshylarynyń kelissózderi barysynda QR Prezıdenti Qasym-Jomart Toqaev bıyl 6 aıda eki eldiń taýar aınalymy 500 mıllıon dollardan asqanyn atap ótti. Bul rette ózara saýda-sattyq kólemin 2 mıllıard dollarǵa deıin arttyrý josparlanyp otyr.