Durys sheshim qabyldaý úshin sarapshylar keńesi óte qajet - Qazbek Maıgeldınov
Forým aldynda tilshilerge suhbat bergen QR Tuńǵysh Prezıdenti - Elbasy kitaphanasy Geosaıasat jáne óńirlik zertteýler qyzmetiniń basshysy Qazbek Maıgeldınovtyń aıtýynsha, mundaı forýmdardyń mańyzy zor. Sebebi, álemmen birge Eýrazııada da túrli trendter men jańashyldyqtar birinen keıin biri paıda bolyp jatyr. Al osy ózgeristerdiń paıdasy men zııanyn aımaqtaǵy yntymaqtas elder saraptap, bilip otyrýy tıis.
«Qazirgi ýaqytta júrgizilip jatqan Qazaqstannyń syrtqy saıasaty - kópvektorly saıasat. ıAǵnı, biz barlyq eldermen teń dárejede qarym-qatynas jasaımyz. Onyń ishinde Reseı Federatsııasymen strategııalyq qarym-qatynastamyz. Sondyqtan, aldaǵy kúnderi qaýipsizdik máselelerinde, gýmanıtarlyq nemese ekonomıkalyq salada bolsyn, eki el úshin tıimdi kez kelgen qıyndyqtan shyǵý joldaryn izdeý kerek. Osyǵan baılanysty birlesken sheshim qabyldaý úshin sarapshylar keńesteri óte qajet-aq. Ózderińiz biletindeı, AQSh-ta myńnan astam «Mı ortalyǵy» bar. Ókinishke qaraı, mundaı ortalyqtar Qazaqstanda saýsaqpen sanarlyq. Sol sebepti sarapshylardyń pikiri, oıy, rezolıýtsııalyq sheshimderi aldaǵy ýaqytta eki eldiń bıligi úshin óte tıimdi», - deıdi sarapshy Qazaqstan-Reseı sarapshylarynyń ІІІ forýmynda.
Qazbek Maıgeldınov sonymen birge, Qazaqstan men Reseı arasyndaǵy qarym-qatynas kópjaqty formatqa ıe ekenin atap ótti.
«Eń bastysy - Eýrazııalyq ekonomıkalyq odaq aıasynda, sondaı-aq gýmanıtarlyq salada da yntymaqtastyq myǵym. Ekonomıkalyq sıpatty tilge tıek eter bolsaq, jyl saıyn aımaqaralyq forýmdar ótkizilip keledi. Áskerı turǵyda UQShU aıasynda yntymaqtastyq bar. Qazirgi ýaqytta Eýrazııa aımaǵynda ártúrli sıpattaǵy trendter paıda bola bastady. Máselen, QHR júrgizip jatqan Jibek joly ekonomıkalyq saıasaty, sonymen qatar EAEO men «Bir beldeý - bir jol» baǵdarlamasyn yntymaqtastyrý máselelerin taldaý kerek. Osynyń barlyǵy - Qazaqstan-Reseı qarym-qatynasynyń basty tetikteriniń biri. Sol sebepti, búgingi tańdaǵy eń basty qaralatyn máseleler - Qazaqstan men Reseı arasyndaǵy qarym-qatynastyń kópjaqty formatyn odan ary damytý bolyp otyr», - deıdi Qazbek Maıgeldınov.