Prokat ýaqyty aıaqtaldy – Aıda Balaeva «Mirjaqyp. Oıan, qazaq!» fılmi týraly

<p>QR Mádenıet jáne aqparat mınıstri Aıda Balaeva &laquo;Mirjaqyp. Oıan, qazaq!&raquo; fılminiń prokaty jóninde pikir bildirdi, dep habarlaıdy Kazinform.</p>

«Barlyq kınoprokat uıymdarynyń óz kestesi bar. Biz mundaı suranys bolady dep oılamadyq jáne belgili bir ýaqyt aralyǵyn tańdadyq. Kórermender tarapynan osy fılmge qyzyǵýshylyq artqan soń, prokatty taǵy bir aptaǵa uzarttyq. Qazir prokat ýaqyty aıaqtaldy. Óz kórermenin kútip otyrǵan basqa da fılmder bar. Sondyqtan bul jerde esh másele joq dep oılaımyn», - dedi Aıda Balaeva Úkimette ótken brıfıngide.

Óz jaýabynda mınıstr bul kartınanyń ulttyq arnada úsh ret kórsetilgenin eske saldy.

«Sol kezde halyq asqan qyzyǵýshylyq tanytpap edi. Endi bul fılm kópshilikke qoljetimdi jáne ulttyq arnanyń YouTube arnasynan serıalyn kórýge bolady. Men munda eshqandaı problema kórip otyrǵan joqpyn», - dedi Aıda Balaeva.

Eske salsaq, atalǵan «Mirjaqyp. Oıan, qazaq!» atty mınıserıaldyń qysqartylǵan nusqasy 21 qyrkúıekten bastap qalyń jurtshylyqqa jol tartty.

Keıinirek kıno prokaty taǵy bir aptaǵa sozyldy.