Dúnıejúzilik kóshpendiler oıyndarynda tuńǵysh ret barlyq qurlyqtyń ókilderi baq synaıdy

<p>ASTANA. KAZINFORM &ndash; Dúbirli doda jaqyndaǵan saıyn uıymdastyrýshylar bar daıyndyqty pysyqtap jatyr. Buǵan deıin Memleket basshysy Qasym-Jomart Toqaev sporttyq nysandardyń daıyndyǵyn tekserip, sporttyq jarysty joǵary deńgeıde ótkizýdiń mańyzdylyǵyn atap ótken bolatyn.&nbsp;</p>

Ortalyq kommýnıkatsııalar alańynda ótken brıfıngide V Dúnıejúzilik kóshpendiler oıyndaryn daıyndaý jáne ótkizý jónindegi Dırektsııa basshysynyń orynbasary Abylaı Qondybaev baıraqty básekege qatysýǵa 89 elden 2 430 qatysýshy nıet bildirgenin málimdedi. 

«Onyń qataryna jattyqtyrýshylar da kiredi. 21 sport túri boıynsha 97 medal jıyntyǵy sarapqa salynady. Medal sany – 581 dana. V  Dúnıejúzilik kóshpendiler oıyndarynyń jalpy júlde qory – 250 mln teńge», - dedi ol.

Dúnıejúzilik kóshpendiler oıyndaryna qatysýshylar men qonaqtardy qabyldaý úshin 20 qonaqúı men 331 kólik quraly qarastyrylǵan. 

Oıyndar kezinde barlyǵy 1 300 volonter qyzmet atqarady. Sondaı-aq BAQ-qa arnalǵan akkredıtatsııaǵa jalpy 64 elden 1 185 ótinim kelip túsken. Olardyń qatarynda CNN, BBC, Euronews, CCTV, Rai, CBC TV, Balkan Trip TV, TRT Türk telearnalary, National Geographic, Agence-France Presse (Kanada), Lonely Planet, Nikkei Asia jáne basqa da iri BAQ ókilderi bar. Mıllıondaǵan aýdıtorııasy bar blogerler de álemdik jarysty nasıhattaýdan tys qalmaq emes.

V Dúnıejúzilik kóshpendiler oıyndary barysynda medıtsınalyq shtabta 150 medıtsınalyq qyzmetker jumys isteıdi. Sonymen qatar 23 veterınar da jarys alańynda qyzmet atqarady. 

Kóshpendiler oıyndaryna shamamen 560 sporttyq at jáne 45 qus qatysady. 

«Bul álemdik jarysqa alǵash ret qatysatyn elder de bar. Bıyl tuńǵysh ret barlyq qurlyqtyń ókilderi baq synaıdy. Qatysýshy elder arasynda Qazaqstanǵa keletin eń alys el Aýstralııa bolmaq», - dedi Abylaı Qondybaev.

Esterińizge sala keteıik, V Dúnıejúzilik kóshpendiler oıyndary Astana qalasynda 8-13 qyrkúıek aralyǵynda ótedi.