Dúnıejúzilik kóshpendiler oıyndary: Ulttyq qurama qorjynynda 48 medal bar

<p>ASTANA. KAZINFORM &ndash; Qazaqstan ulttyq quramasy Dúnıejúzilik kóshpendiler oıyndarynyń úshinshi jarys kúnin 7 altyn, 7 kúmis, 9 qola medalmen aıaqtady.</p>

«Qazanat» ıppodromy mańyndaǵy etnoaýylda ótken Jamby atý sportynyń Túrki stılinen altyn júldeni Eralhan Aıkóz, al qola júldeni Aıtbek Sarybaı jeńip aldy. Kúmis júldeni túrkııalyq Kerem Igıt enshiledi. Jarystyń ekinshi kúninde ulttyq quramanyń úsh birdeı sportshysy Azııa stılinen júldeli oryndarǵa ıe bolǵan edi.

Týrızm jáne sport mınıstrligi baspasóz qyzmetiniń málimetinshe, aýdaryspaqtan Syrym Іzbasarov (100 keli) mońǵolııalyq sportshy Erbolat Jeńisbekti jeńip, altyn júlde aldy. 100 keliden joǵary salmaqta Birjan Qosalıev Qyrǵyzstan sportshysy Kýmýshbek Qydyrálıevten basym túsip, altyn júldege ıe boldy. Al 90 keli salmaq dárejesinde Esimhan Rahmatillá kúmis júlde enshileli. Ol Qyrǵyzstan sportshysy Islam Berdibekýýlynan jeńildi. Ulttyq qurama sportshylary aýdaryspaqtan jalpy esepte bes altyn, bir kúmis enshiledi.

«Arǵymaq» at-sport kesheninde dástúrli sadaq atýdan «Qalqan» nysanasynan ótken básekede Erbol Tápenov kúmis júldege, al Qasymhan Qanat qola júldege ıe boldy. Bul – Qasymhannyń Kóshpendiler oıyndaryndaǵy ekinshi qola medali. Ekinshi jarys kúninde «Pýta» nysanasy boıynsha Jánibek Qulmyrzaev altyn, Aıkórkem Batıhan qola júlde alǵan bolatyn.

Jaqsylyq Úshkempirov atyndaǵy Jekpe-jek saraıynda qazaq kúresinen erler men áıelder árqaısy tórt salmaq dárejesinde synǵa tústi. Qazaqstandyq balýandar ekinshi jarys kúni 4 altyn, 1 kúmis, 2 qola júlde ıelendi. Áıelder arasynda Zarına Sarıpova (65 keli) men Roza Nysantaıqyzy (70 keli) altyn júlde aldy.

Zamzagýl Faızollanova (77 keli) kúmis júldege, Albına Bahıeva (+77 keli) qola júlde aldy. Erler arasynda Ersultan Muzapparov (100 keli) pen Nurdáýlet Jarylǵapov (+100 keli) altyn júlde aldy. Erasyl Janataev (90 keli) qola júlde enshiledi. Qazaqstanyq balýandar qazaq kúresinen barlyǵy 15 medal aldy: 12 altyn, 1 kúmis, 2 qola.

Aıta ketsek, jarystyń birinshi kúni boz kilemde kúresken 8 qazaqstandyq sportshynyń barlyǵy da jeńistiń bıik tuǵyryna kóterilgen bolatyn.

«Alaý» muz aıdyny saraıynda ótken kýrashtan ekinshi jarys kúninde 7 balýan júlde aldy. Erler arasynda Ernur Súleımenov (60 keli), Aıbek Qazaqbaev (66 keli), Nurdin Shaımerden (73 keli), áıelder arasynda Tolǵanaı Abeýova (57 keli) kúmis júldege ıe boldy. Marat Nıgmatýllaev (60 keli) pen Ádilet Ahmetǵalı (73 keli), áıelder arasynda Altynaı Nurhanova (57 keli) qola júldege ıe boldy. Osylaısha, ulttyq qurama kýrashty 13 júldemen (1 altyn, 6 kúmis 6 qola) qorytyndylady.

Saha halqynyń ulttyq sporty mas-restlıngten erler arasynda 105 keli salmaq dárejesinde Erkebulan Erlan men 75 keli salmaq dárejesinde Olga Dýshaeva qola júldeger atandy. Ulttyq qurama sportshylary Kóshpendiler oıyndaryn tórt qolamen aıaqtady.

«Qazanat» ıppodromynda ótip jatqan kókpardan irikteý kezeńinde Qazaqstan AQSh quramasyn 16-4 esebimen jeńdi.

Asyq atý men bes asyqtan Qazaqstan quramasy fınalǵa shyqty. Fınaldyq oıyndar 11 qyrkúıek kúni «Alaý» muz aıdyny kesheninde ótedi.