Dúnıejúzilik kóshpendiler oıyndary: Sportshylarǵa qandaı as máziri usynylady

<p>ASTANA. KAZINFORM &ndash; Dúnıejúzilik kóshpendiler oıynynyń bastalýyna az ýaqyt qaldy. Búginde uıymdastyrýshylar sportshylardy kútip alýdan bastap shyǵaryp salýǵa deıingi ázirlikti myqtap qolǵa alǵan. Bizdi qyzyqtyrǵany: sportshylar qandaı tamaq jeıdi eken?</p>

Bul saýaldy uıymdastyrýshylarǵa qoıǵan edik. Olar sportshylar aıaldaıtyn qonaq úılerde 3 mezgil tamaqtandyrylatynyn jetkizdi. Aıta keteıik, sportshylarǵa 20 qonaq úı qarastyrylǵan.

«Sportshylar astyń qunarlylyǵyna erekshe mán beretini belgili. Bir kúndik astyń qýattylyǵy 4 myń kılokalorııadan kem bolmaýy tıis. Bul rette, meımandarǵa 5 túrli as máziri usynylyp otyr. Olardyń qatarynda qazaq, shyǵys, eýropalyq, Jerorta teńizi jáne vegetarıandarǵa arnalǵan arnaıy as máziri bar. Botqa jegisi keletinder de bolyp qalady-aý degen oımen dándi daqyldardy sýda qaınatyp jasalatyn taǵamdardy da nazarda ustap otyrmyz», - deıdi V Dúnıejúzilik kóshpendiler oıyndaryn daıyndaý jáne ótkizý dırektsııasy tamaqtandyrý jáne ornalastyrý bóliminiń basshysy Lázzat Batyrbekova.

Aıtpaqshy, ár dastarhanda qazaqtyń ulttyq taǵamdary bolatynyn atap ótken jón. Osylaısha, sheteldik sportshylarǵa qazaqtyń ulttyq as máziri dáriptelmek.

Volonterler men tóreshilerdi tamaqtandyrý da nazardan tys qalmaq emes. 

Esterińizge salsaq, buǵan deıin sheteldik sportshylar tulparlaryn astanaǵa qalaı ákeletinin zerttep kórgen edik.