Dúnıejúzilik kóshpendiler oıyndary: Dúbirli doda aıaqtaldy
Alys-jaqynnan kelgen jankúıerler jarystyń joǵary deńgeıde uıymdastyrylǵanyn jarysa aıtyp, rýhanı jiger alǵanyn jetkizdi.
Dúbirli dodanyń jabylý saltanatynda sóz alǵan Dúnıejúzilik etnosport konfederatsııasynyń prezıdenti Bilál Erdoǵan QR Prezıdenti Qasym-Jomart Toqaevqa jarystyń joǵary deńgeıde uıymdastyrylǵany úshin alǵysyn bildirdi.
«Qazaqstan túrki álemine ǵana emes, búkil álemge týystas halyqtardyń baýyrmaldyǵyn, yntymaqtastyǵyn pash ete bildi. Sporttyq is-shara arqyly túrkitildes elderdiń baı mádenıeti, salt-dástúri aıryqsha dáripteldi», — dedi ol.
QR Týrızm jáne sport mınıstri Erbol Myrzabosynov jarystyń tartysty bolǵany sonshalyq, júldegerlerdiń qatarynda ártúrli eldiń ókilderi kóp ekenin atap ótti.
«Qazaq topyraǵynda uıymdastyrylǵan dúbirli doda máni tereń, mazmuny baı jarys retinde baǵalanyp jatyr. Bar álemge ulttyq sportymyz ulyqtalyp, mádenıetimiz odan saıyn nasıhattaldy. Dodanyń túrki áleminiń altyn besigi — qazaq jerinde uıymdastyrylýy biz úshin zor mártebe»,- dedi mınıstr.
Budan keıin dástúrge saı, V Dúnıejúzilik kóshpendiler oıyndaryn daıyndaý jáne ótkizý dırektsııasynyń basshysy Naıl Nurov kıeli sýǵa toly torsyqty QR Týrızm jáne sport mınıstri Erbol Myrzabosynovqa tabystady. Al ol óz kezeginde kelesi Dúnıejúzilik kóshpendiler oıyndaryn qabyldaıtyn Qyrǵyzstan eliniń ókiline tabys etti. Qyrǵyz Respýblıkasynyń Mádenıet, aqparat, sport jáne jastar saıasaty mınıstri torsyqty tóbesine kóterip, qazaqstandyqtardy eki jyldan keıin uıymdastyrylatyn dúbirli dodanyń meımany bolýǵa shaqyrdy.
Aıta keteıik, V Dúnıejúzilik kóshpendiler oıyndarynda barlyǵy 97 medal jıyntyǵy sarapqa salyndy. Jalpykomandalyq esepte Qazaqstan kósh bastady.