Dúnıejúzilik kóshpendiler oıyndary: Bıletti kimder jeńildikpen alady
Oıynnyń ashylý saltanaty 8 qyrkúıek kúni «Astana-Arena» stadıonynda ótedi. Bıletter 15 000-50 000 teńge aralyǵynda satylyp jatyr.
Sport baǵdarlamasyna 21 sport túri kiredi. Bul rette, jarystardyń ortasha bılet quny – 3 600 teńge. Máselen, qazaq kúresi, alysh jáne kórásh sportyna bıletter 2 500 teńgeden 7 500 teńge aralyǵynda eken. Jarystar Jaqsylyq Úshkempirov atyndaǵy jekpe-jek saraıynda ótedi.
«Alaý» muzaıdynynda asyq atý, ordo, mas-restlıng, kúrásh, arqan tartý jáne ashyrtmaly aba gúreshi boıynsha kil myqtylar júldege talasady. Bılet quny 1 000-3 000 teńge aralyǵynda.
Kókpar, kók bóri jáne báıge boıynsha tartysty jarystar «Qazanat» ıppodromynda ótedi. Kókpar men kók bóri boıynsha irikteý kezeńderine bıletter quny 2 000-15 000 teńge aralyǵynda bolsa, fınaldyq kezeńiniń bıletteri 2 000 teńgeden bastalyp, 15 000 teńgege deıin jetpek. Báıge jarystaryna bılet quny 3 000-15 000 teńge bolmaq. Etnoaýylda jamby atý, teńge ilý, aýdaryspaq, qusbegilik, sondaı-aq alyptar saıysy «Powerful Nomad» jarystaryn kórýge bolady. Atalǵan sport túrleri boıynsha bıletter 1 000 teńgeden bastalyp, 2 000 teńgege deıin satylady.
Kórermen kózaıymyna aınalǵan dástúrli sadaq atý sporty boıynsha básekeler «Arǵymaq» at-sporttyq saýyqtyrý kesheninde ótedi. Bıletter quny 600 teńgeden bastalyp, 3 000 teńgege deıin usynylady. Dástúrli zııatkerlik oıyndar sanalǵan toǵyzqumalaq, mangala jáne ovarı jarystary kórermendersiz ótedi.
Aıtpaqshy, azamattardyń jekelegen sanattary úshin ártúrli jeńildikter qarastyrylǵan. 50% jeńildik mektep oqýshylary (6 jastan 18 jasqa deıin) men zeınetkerler úshin qoljetimdi. 5 jasqa deıingi balalar (orynsyz) men I jáne II toptaǵy múgedekter bıletterdi tegin ala alady. Jeńildik bıletterin rastaıtyn qujatty kórsetkennen keıin offlaın kassalardan satyp alýǵa bolady.
Barlyq jarysqa bıletterdi resmı bılet operatorynyń www.zakazbiletov.kz saıtynan satyp alýǵa bolatynyn eske salamyz.