Dúnıejúzilik kóshpendiler oıyndary: Ashylý saltanatyndaǵy tarıhı ǵalamat
Ásirese, kóshpendi halyqtardyń tarıhynan syr shertetin kórinister erekshe áser etip, kórermender ótken ǵasyrlarǵa sapar shekkenin alǵa tartýda. Edil patsha, Tumar patshaıym, Joshy han dáýirindegi tarıhı sátter tartymdy shyqqanyn atap ótken jón. Osy rette, bul sharýaǵa jaýapty bolǵan QR Mádenıet jáne aqparat mınıstrliginiń mamandaryna habarlastyq. Ondaǵylar «Altyn jaýyngerler sherýi» dep atalǵan bólimniń mańyzdylyǵyn tarqatyp berdi.
«Kóshpendilerdiń eń úlken jańalyǵy – dóńgelekti oılap tabýy. Sol arqyly nomadtar jyldamdyǵyn arttyrdy, el men eldiń, jer men jerdiń arasyn qosty. Edil patsha bastaǵan ǵundar, Tumar patshaıym bastaǵan saqtar óz dáýrinde laıyqty ómir súrip qana qoımaı, keıingi urpaqqa da úlgi bolyp qaldy. Temir men qola, altyn men kúmis óndiris bastalǵan soń kóshpendilerdiń qarý-jaraǵy, múlki, tipti qolóneri de ózgerdi. Skıfterden qalǵan ańdyq stıldegi buıymdar – sonyń dáleli. Árıne, tarıhtyń bárin az ýaqyttyń ishinde beıneleý múmkin emes. Dese de, kórermenderdiń qoıylymnan erekshe áser alǵanyn ańǵardyq», - dedi mınıstrliktiń baspasóz qyzmeti.
Ashylý saltanatyndaǵy besinshi bólim «Joshy han ulysy (Altyn orda)» dep atalǵan. Qoıylymdy tamashalaǵan ár kórermen rýh alyp, jigerlene túskeni ras.
«Joshy ulysy – Altaıdan qazirgi Eýropanyń ortalyǵyna deıin sozylyp jatqan kóshpelilerdiń biregeı memleketi. Bul kóptegen saıası ózgerister ákelgen, órkenıetterdi biriktirip, álemdik mádenıet pen ekonomıkanyń damýyna serpin bergen búkil adamzattyń tarıhy. Sol sebepti dúbirli dodanyń ashylý saltanatynda Joshy ulysy jaıly arnaıy qoıylym daıyndaý erekshe mańyzy zor dúnıe boldy. Bul – kóshpendiler tarıhyndaǵy qaıtalanbas dáýir», - delingen mınıstrliktiń agenttik tilshisine bergen jaýabynda.
Aıta keteıik, Dúnıejúzilik kóshpendiler oıyndarynyń ashylý saltanatyn otandyq telearnalardan bólek, álemniń 19 telearnasy kórsetti. Kóshpendiler oıyndary tarıhynda mundaı halyqaralyq deńgeıde aýqymdy telehabar taratý birinshi ret qolǵa alynǵanyn atap ótken jón.
Ashylý saltanaty dástúrli túrde sport delegatsııalarynyń sherýinen bastalyp, tańǵajaıyp shoýǵa ulasty. Kórermenderge zamanaýı sahnalyq tehnologııalar men mýltımedııalyq dızaın qoldanylǵan 2 saǵattyq aýqymdy mýzykalyq-teatrlandyrylǵan qoıylym usynyldy. Álem kóz tikken aýqymdy sharaǵa 3 000-ǵa jýyq ónerpaz qatysty.