Dúnıejúzilik kóshpendiler oıyndary: Alǵashqy altyn Frantsııa qorjynyna tústi

<p>ASTANA. KAZINFORM &ndash; V Dúnıejúzilik kóshpendiler oıyndarynyń alǵashqy jarys kúninde sportshylar jamby atý sportynyń majar stıli boıynsha júldege talasty.</p>

Jamby atýǵa 27 memleketten 78 sportshy qatysty. Olar 11 topqa bólinip, úzdikter iriktelip shyqty.

Foto: Maksat Shagyrbaev/ Kazinform

Nátıjesinde Frantsııa quramasynyń sportshysy Rafael Malet dúbirli dodanyń alǵashqy altyn medalin ıelendi. Mońǵolııa ókili Altankýıag Nergııý kúmis júldeni oljalady. Frantsııanyń taǵy bir ókili Gaıtan Blot «qolaǵa» qol jetkizdi.

Foto: Maksat Shagyrbaev/ Kazinform

Qazaqstan ulttyq qurama múshesi Abzal Tulybekov úzdik bestikke ilikti.

Foto: Maksat Shagyrbaev/ Kazinform

«Majar stıliniń ereksheligi — sportshy atpen jyldamyraq shaýyp, nysanaǵa kóp oq tıgizý kerek. Jebe sanyna shekteý joq. Qazaqstan dırektsııasy barlyq sportshyny atpen qamtamasyz etti. Toqsanǵa jýyq atty daıyndadyq. Kóshpendiler oıyndaryna ulttyq qurama sportshylary úsh aı daıyndaldy. Jyl basynan beri tórt oqý-jattyǵý jınyn ótkizdik. Ár sportshyǵa jeke taktıka ázirledik», — dedi Jamby atýdan Qazaqstan ulttyq quramasynyń bas bapkeri Eldos Badashev.

Foto: Maksat Shagyrbaev/ Kazinform

Aıta keteıik, Qazaqstan quramasy sapynda Aıtbek Sarybaı, Eralhan Aıkóz, Batyr Beksaýyt, Abzal Týlybekov baq synady. Sportshylarymyz buǵan deıin Álem, Eýropa chempıonattarynda júldeli oryndardy ıelengen.

Sportshylarymyz aldaǵy úsh kúnde 3 stıl (azııa, túrik, qazaq) boıynsha júldege talasatyn bolady.