Dúnıejúzilik bank ókilderi sý tasqynynan kelgen zalalǵa baǵalaý júrgizýdi usyndy

<p>ASTANA. KAZINFORM -<strong> </strong>Premer-Mınıstrdiń orynbasary &ndash; ulttyq ekonomıka mınıstri Nurlan Baıbazarov Astanada Dúnıejúzilik banktiń (DB) jáne Halyqaralyq qarjy korporatsııasynyń (HQK) ókilderimen kezdesti, dep habarlaıdy Úkimettiń <a href="https://primeminister.kz/news/kazakstan-duniezhuzilik-bankpen-birlesken-zhana-zhobalardy-damytuga-nietti-28310" target="_blank" rel="noopener">baspasóz</a> qyzmeti.</p>

Baspasóz qyzmetiniń habarlaýynsha, kezdesýge DB Ortalyq Azııa boıynsha óńirlik dırektory Tatıana Proskýrıakova, Dúnıejúzilik banktiń QR-daǵy turaqty ókili Andreı Mıhnev, Qazaqstan, Qyrǵyzstan jáne Tájikstan boıynsha HQK óńirlik menedjeri Zafar Hashımov jáne HQK-nyń Qazaqstandaǵy ókildiginiń basshysy Ekaterına Bendjamın qatysty.

Taraptar ekologııalyq jobalarǵa bólingen buryn qarjylandyrylǵan ınvestıtsııalyq jobalar men granttardyń iske asyrylý barysyn, sondaı-aq yntymaqtastyqtyń yqtımal jańa baǵyttaryn talqylady.

Nurlan Baıbazarov Dúnıejúzilik banktiń QR atynan basqarýshysy retinde Uıymmen odan ári jumys isteýde memlekettik-jekeshelik áriptestikti damytý jáne ınfraqurylymǵa ınvestıtsııalar tartý máselelerine erekshe nazar aýdarýǵa nıetti ekenin atap ótti. Ol, sondaı-aq, QR Úkimetin konsýltatsııalyq qoldaý sheńberinde Dúnıejúzilik bank iske asyratyn Birlesken ekonomıkalyq zertteýler baǵdarlamasyn jalǵastyrýdyń mańyzdylyǵyna toqtaldy.

Dúnıejúzilik bank pen HQK ókilderi óz tarapynan ornyqty ári ınklıýzıvti ekonomıkany damytýǵa, ekologııalyq jaǵdaıdy jaqsartýǵa baǵyttalǵan Úkimettiń is-qımylyna qoldaý bildirip, osy baǵyttardaǵy jobalardy qaraýǵa daıyn ekendikterin habarlady. Sondaı-aq Qazaqstandy Ortalyq Azııa úshin CAWEP sý-energetıkalyq baǵdarlamasyna belsendi qatysýǵa shaqyrdy. Atalǵan baǵdarlama ózgermeli klımat jaǵdaıynda óńirdiń sý-energetıkalyq qaýipsizdigin arttyrý úshin jaǵdaı jasaýǵa baǵyttalǵan.

Dúnıejúzilik bank toby turmystyq qaldyqtardy qaıta óńdeý, ınfraqurylymdy qaıta qurý, aýyl sharýashylyǵyn, sý jáne energetıka salalaryn damytý, Aral teńizin qalpyna keltirý, ǵylym men bilim berýdi damytý jónindegi jobalardy qarjylandyrýǵa múddeli. Elimiz úshin qıyn kezeńde granttyq qoldaý retinde aýqymdy sý tasqynynan keltirilgen zalaldy baǵalaýdy júrgizý usynyldy.

Nurlan Baıbazarov Qazaqstan eldiń áleýmettik-ekonomıkalyq damýyna yqpal etetin Dúnıejúzilik bank tobymen áriptestikke úlken mán beretinin aıtty. Neǵurlym tıimdi ózara is-qımyl jasaý úshin qazaqstandyq tarap qolda bar bıýrokratııalyq kedergilerdi joıýǵa nıetti. Máselen, kvazımemlekettik kompanııalar úshin halyqaralyq qarjylandyrýǵa qol jetkizý kezinde qarsy kepildikter berý jónindegi talap alynyp tastalmaq.

«Dúnıejúzilik bank toby 30 jyldan astam ýaqyt boıy bizdiń elimiz úshin mańyzdy strategııalyq seriktesterdiń biri ári eń iri jeke kapıtal kózi bolyp sanaldy. Biz seriktestiktiń qalyptasqan dástúrlerin saqtap, jańa birlesken jobalardy damytýǵa nıettimiz», — dep sózin túıindedi vıtse-premer.