Dúnıejúzilik týrızm kúni: Zerendi aýdanynda otbasylyq demalys orny ashyldy

KÓKShETAÝ. QazAqparat - Táýelsizdiginiń 30 jyldyǵyna oraı jáne 27 qyrkúıek – Dúnıejúzilik týrızm kúni Zerendi aýdanynda Danel týrıstik nysany ashyldy, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Vedomstvonyń málimetinshe, nysanǵan salynǵan ınvestıtsııanyń jalpy kólemi shamamen 60 mıllıon teńgeni qurady, onyń 9 mıllıon teńgesi «Bıznestiń jol kartasy-2050» baǵdarlamasy boıynsha júzege asyrylǵan.

«Týrıstik nysannyń basty baǵyty-ekologııalyq taza aýdanda otbasylyq demalys uıymdastyrý. Demalys ornyndaǵy eki jáne tórt oryndyq bólek turǵan úılerde týrıster úshin 28 tósek-oryn bar», - deıdi vedomstvodan.

Zerendi aýylynyń «Zeren» saıajaı kentinde ornalasqan týrıstik nysannyń ıesi Rýslan Asylbekovtyń aıtýynsha, munda otbasymen kelip demalatyndarǵa barlyq jaǵdaı jasalǵan.

«Demalýshylar úshin fýtbol alańy, bamperbol alańy bar, Sonymen birge, monsha da qarastyrylǵan. Danel týrıstik nysanynda tórt jańa jumys orny ashyldy. Olardyń ortasha eńbekaqysy 150 myń teńgeni quraıdy», - dep atap ótti kásipker Rýslan Asylbekov.