Dúnıejúzilik meteorologııalyq uıym: sońǵy 7 jyl tarıhtaǵy eń jyly kezeń boldy

JENEVA. QazAqparat – Sońǵy jeti jyl baqylaý tarıhyndaǵy eń jyly kezeń boldy, al álemdik muhıt deńgeıi jańa maksımýmǵa deıin kóterildi. Bul týraly 31 qazanda Glazgoda ashylǵan BUU-nyń klımat jónindegi konferentsııasynyń bastalýyna daıyndalǵan Dúnıejúzilik meteorologııalyq uıymnyń (DMU) jańa baıandamasynda aıtylǵan, dep habarlaıdy QazAqparat.

DMU-nyń 2021 jylǵy aldyn ala esebinde birqatar BUU agenttikteriniń, Ulttyq meteorologııalyq jáne gıdrologııalyq qyzmetterdiń derekteri, sondaı-aq jetekshi ǵylymı sarapshylardyń boljamdary jınaqtalǵan, dep málimdedi BUU baspasóz qyzmeti.

«Jahandyq klımattyń jaı-kúıi týraly DMU esebi planetanyń bizdiń kóz aldymyzda ózgerip jatqanyn kórsetedi. Ekojúıeler búkil álem boıynsha joıylýda. Ǵalymdar óz sózderin aıtty, endi kezek saıası kóshbasshylarda. KS-26 ózgeris kezeńi bolýy kerek. Biz bolashaǵymyzdy qorǵaý jáne adamzatty qutqarý úshin dereý áreket etýge mindettimiz», - dep málimdedi BUU Bas hatshysy Antonıý Gýterrısh beınehabarlamada.

«Baqylaý tarıhynda alǵash ret Grenlandııa muz shyńynda qar emes, jańbyr jaýdy. Muzdyń erýi nátıjesinde kanadalyq muzdyqtar baıaý joǵalyp jatyr», – dedi DMU Bas hatshysy Petterı Taalas.

2021 jylǵy qańtar-qyrkúıek aılaryndaǵy ortasha jahandyq temperatýra 1850–1900 jyldardaǵy ortasha mánnen Tselsıı shkalasy boıynsha 1,09 gradýsqa joǵary boldy.