Dúnıejúzilik kóshpendiler oıynynda Qazaqstan áıelder quramasy da saıysqa túsedi

ASTANA. QazAqparat – Túrkııada ótetin IV Dúnıejúzilik kóshpendiler oıyndarynda qazaq kúresinen tuńǵysh ret Qazaqstan áıelder quramasy saıysqa túsedi. Muny Ortalyq kommýnıkatsııalar qyzmetinde ótken brıfıngte Sport jáne dene shynyqtyrý komıtetiniń tóraǵasy Samat Erǵalıev málim etti, dep habarlaıdy QazAqparat tilshisi.

«Saıys Túrkııanyń Iznık qalasynda ótedi. Oǵan Qazaqstan atynan jalpy 80-ge jýyq delegat qatysady. Onyń ishinde 49 sportshy bar. Bul sportshylardyń 50 paıyzy memleket bólgen qarjy esebinen, al qalǵan 50 paıyzy uıymdastyrýshy taraptyń esebinen barady. Sonymen qatar, biz qazaq kúresinen tuńǵysh ret áıelder qurama komandasyn da alyp bara jatyrmyz. 3 sportshy áıel bolady», - dep atap ótti Samat Erǵalıev.

Eske salaıyq, 29 qyrkúıek pen 4 qazan aralyǵynda Túrkııanyń Iznık qalasynda IV Dúnıejúzilik kóshpendiler oıyndary ótedi.

Qosa ketsek, Ulttyq jáne at sporty túrleri ortalyǵynyń dırektory Baqdáýlet Sábıtov Dúnıejúzilik kóshpendiler oıyndarynda qazaqstandyq top qaı saıystan júlde alýy múmkin ekenine boljam jasaǵan bolatyn.